لە خانەوادەیەکدا زیاتر لە کەسێک سوودمەند دەبن لە وەرگرتنی زەوی

ئاڤا نیوز

 

قۆناغی دووەمی دابەشکردنی زەوی دەستیپێکرد و ئەمجارە فراوانە ئەو شوێنانەی لە قۆناغی یەکەم دابەش نەکرابوو، لەم قۆناغە دابەش دەکرێت، ئاڤا بەدواداچوونی بۆ پرسیارێکی فەرمانبەران کردووە سەبارەت بەوەی، لەنێو خانەوادەیەکدا چەند کەس لە پرۆسەی وەرگرتنی زەوی سوودمەند دەبن؟، وەڵامەکەی تەنیا لای ئاڤایە.

 

چیرۆکی سەرەکی: لە پرۆسەی دابەشکردنی زەوی نزیکەی 300 هەزار کەس سوودمەند دەبن و زەویان پێ دەدرێت، لە قۆناغی یەکەمدا زیاتر لە 15 هەزار کەس لە هەرێمی کوردستان زەوییان وەرگرت و بۆ قۆناغی دووەمیش ڕێژەکە بەرزکراوەتەوە و نزیکەی 200 هەزار فۆڕمی پەسەندکراو بۆ شارەوانییەکان دەگەڕێنرێتەوە.

 

لێدوانی فەرمی: سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤای ڕاگەیاند: لە هەر خانەوادەیەکدا هەر چەند فەرمانبەر هەبن دەتوانن سوودمەند ببن، بۆ نموونە باوک و کوڕ دەتوانن سوودمەند بن، واتا ئەگەر کوڕەکەش سینگڵ بێت هەردووکیان سوودمەند دەبن، بەو مەرجەی کوڕەکە باوکی وەک خاڵ نەنووسیبێت و باوکەکەش بەهەمان شێوە، ئەوکات هەردووکیان سوودمەند دەبن، ئەمە بۆ سەرجەم ئەندامانی خێزانەکە ڕاستە، تەنیا ژن و مێرد بەیەکەوە ناتوانن زەوی وەربگرن.