لەسەر هێرشکردنە سەر جووتیارانی کورد، وێنە و ڤیدیۆکانی ئاڤا ڕادەستی دادوەر دەکرێن

ئاڤا نیوز

 

جارێکی دیکە سوپای عێراق لە نێو گوندی شەناغەی سنووری سەرگەڕان بڵاوەی پێکراوە و جووتیارە کوردەکانیش کارە کشتوکاڵییەکانیان هەڵپەسارد.

 

وێنە گەورەکە: ڕۆژی دووشەممە 2025-02-17، جووتیارانی گوندی شەناغە لە سنووری سەرگەڕان، خەریکی کێڵانی زەوییەکانیان بوون، بەڵام هێزێکی زۆری سوپای عێراق هەڵیکوتایە سەر جووتیاران و کارەکانیانی پێ ڕاگرتن، دواتر سەربازێکی عێراقی پەلاماری جووتیارانی کوردی دا، ئێستا دادگا سکاڵایەکی وەرگرتووە کە لە دژی جووتیارێکی کورد تۆمار کراوە. 

 

لێدوانی فەرمی: محەممەد ئەمین، نوێنەری جووتیارانی کورد لە گوندی شەناغە بە ئاڤا میدیای راگەیاند: بۆ پێشکەشکردنی بەڵگە و شایەتحاڵەکان لەسەر پەلاماردانی سەربازە عێراقییەکە، ئەمرۆ سێشەممە سەردانی دادگەم کردووە، بەڵام لەوێ شۆک بووین کە زانیمان سێ ڕۆژ لەمەوبەر سەربازەکە چووەتە بەردەم دادوەر و سکاڵای لەسەر من تۆمار کردووە.

-سەربازەکە لەبەردەم دادوەر گوتویەتی لەلایەن جووتیارەکەوە پەلامار دراوم.

-لە کارەکانی دادگە نیگەرانم، سەرەڕای پەلاماردانم لەلایەن سەربازەکەوە، خەریکە سزا دەدرێم.

- بۆ  پاراستنی ناوچەکە و گەیشتن بە مافەکانمان، کارە کشتوکاڵییەکانمان ڕاگرتووە.

 

لەلایەکی دیکەوە: یوسف شوانی، پارێزەری کەیسەکەی محەممەد ئەمین، بە ئاڤا میدیای گوت: بە تۆمەتی لێدان و هێرشکردنە سەر سەربازەکە سکاڵا لەسەر جووتیارە کوردەکە تۆمار کراوە.

-داوای گۆڕینی ئەو ماددەیەمان کردووە کە سکاڵاکەی پی تۆمار کراوە.

-پێویستە ڕاستییەکان لە دادگە نەشاردرێنەوە.

 

ئەوەی پێویستە بیزانیت: پارێزەرەکە ئەوەی بۆ ئاڤا میدیا ئاشکرا کرد، کە ئەو ڤیدیۆ و وێنانەی ئاڤا میدیا لەکاتی هێرشەکەی سوپای عێراق بۆ سەر جووتیارانی کورد تۆماری کردووە، خراونەتە بەر دەستی دادوەر.

ئەمەش بزانە: دیارترین ئەو بەڵگانەی ئاڤا میدیا کە جووتیارە کوردەکە لە دادگە پشتی پێ بەستووە، ساتی شکاندنی سویچی تراکتۆری جووتیارەکانە لەلایەن سەربازێکی سوپای عێراقەوە.