سێرگی لاڤرۆڤ دوای چاوپێکەوتنی لەگەڵ ئەردۆغان گەیشتە تاران

ئاڤا نیوز

وەزیری دەرەوەی ڕووسیا لەسەر داوای عەباس عێراقچی، هاوتا ئێرانییەکەی سەردانی تارانی کرد و بڕیارە چەند بابەتێکی گرنگ تاوتوێ بکەن.

وێنە گەورەکە: سێرگی لاڤرۆڤ، وەزیری دەرەوەی ڕووسیا دوای سەردانی بۆ تورکیا و چاوپێکەوتنی لەگەڵ ڕەجەب تەیب ئەردۆغان، سەرۆکی تورکیا ئەمڕۆ بە سەردانێک و لەسەر داوای عەباس عێراقچی وەزیری دەرەوەی ئێران گەیشتە تاران و بڕیارە لەسەر بابەتی بەرنامە ئەتۆمییەکانی ئێران و هاوکاری نێوان دوو وڵات قسە بکەن. هاوکات  گفتوگۆ لەبارەی پلانی کاری هاوبەشی گشتگیر بکەن.

ڕاگەیێنراوی فەرمی: وەزارەتی دەرەوەی ڕووسیا لە بەیاننامەیەکدا ڕایگەیاند: لە میانی سەردانەکەی بۆ ئێران، چەند بابەتێکی گرنگ تاوتوێ دەکرێت وەک هاوکاری بازرگانی و ئابووری و جێبەجێکردنی پڕۆژە هابەشەکان دەربارەی وزە و پرسە نێودەوڵەتییەکانی وەک بارودۆخی سووریا و یەمەن.

لەلایەکی دیکەوە: ڕۆژنامەی ئیعتیمادی ئێرانی لەبارەی سەردانەکەوە نووسیویەتی: پێدەچێت لاڤرۆڤ بەنیاز بێت داوای هەڵوێستەکانی تاران بکات بۆ ئەوەی لە میانەی دانوستانەکانی نێوان ڕووسیا و ئەمریکا هەڵوێستیان بەرز بکاتەوە.

ئەوەی پێویستە بیزانیت: ئەم سەردانەی لاڤرۆڤ لە کاتێکدایە کە پەیوەندییەکانی نێوان ڕووسیا و ئەمریکا لەگەڵ دەستبەکاربوونی دۆناڵد ترەمپ، سەرۆکی ئەمریکا، لە گۆڕانکاریدایە.

باکگراوند: دوایین جار، وەزیری دەرەوەی ڕووسیا لە 23ـی تشرینی یەکەمی 2023 سەردانی تارانی کرد، بە مەبەستی بەشداریکردن لە کۆبوونەوەی وەزیرانی دەرەوەی میکانیزمی ڕاوێژکاری هەرێمی "3+3" بۆ باشووری قەوقاز (ئەرمەنستان، ئازەربایجان، گورجستان، ئێران، ڕووسیا و تورکیا).