عێراق بۆ پەرەپێدانی کێڵگە نەوتییەکانی کەرکووک ڕێککەوتنێک لەگەڵ BP واژۆ دەکات

ئاڤا نیوز

بەسەرپەرشتی سەرۆکوەزیرانی عێراق، وەزارەتی نەوتی فیدراڵ و کۆمپانیای بریتیش پترۆلیۆمی بەریتانی، ڕێککەوتنێکیان بۆ پەرەپێدانی کێڵگە نەوتییەکانی کەرکووک واژۆ کرد.

ئەوەی پێویستە بیزانیت: 29ی مانگی ڕابردوو، زەید یاسری، سەرۆکی لقی عێراقی کۆمپانیای بریتش پترۆڵیۆم BPى به‌ریتانی بە ئاڤا میدیای ڕاگەیاندبوو، گفتوگۆکانیان لەگەڵ وەزارەتی نەوت بەگوێرەی لێکتێگەیشتنەکان بۆ گەیشتن بە ڕێککەوتنێک بەردەوامن و ئومێدیان هەیە لە مانگی شوباتدا هەردوولا بگەنە ڕێککەوتنی کۆتایی.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاویکردەوە:

- بە سەرپەرشتی محەممەد شیاع سوودانی، سەرۆکوەزیرانی عێراق، ڕێککەوتنی نۆژەنکردنەوە و گەشەپێدانی چوار کێڵگە نەوتییە سەرەکییەکانی کەرکووک لە نێوان کۆمپانیای نەوتی باکووری سەر بە وەزارەتی نەوتی فیدراڵ و کۆمپانیای بریتیش پترۆلیۆم (BP)ی بەریتانی واژۆکرا.

- دۆسییە هونەرییەکان و مەرجەکانی گرێبەستەکە لەوانەش مۆدێلی ئابووری پڕۆژەکە ڕێککەوتنیان لەسەر کراوە، بەجۆرێک گەرەنتی سوودگەیاندن بە لایەنی عێراقی دەکەن، ئەوەش دوای گفتوگۆی درێژخایەن بووە لەگەڵ وەزارەتی نەوت، بە ئامانجی وەبەرهێنانی نمونەیی لە وزە و دابینکردنی نەوتی پێویست بۆ پاڵاوگەکانی باکوور و کەمکردنەوەی پشت بەستن بە نەوتی باشوور، ڕێککەوتنەکەش قۆناغی کۆتاییە پێش ئەنجامدانی گرێبەست.

- ڕێککەوتنەکە گەشەپێدانی کێڵگە سەرەکییەکانی کەرکووک دەگرێتەوە کە بریتین لە (بای حەسەن، قوبەی بابا و هاڤانا، جەمبۆر و خەباز)، لەناو یاندا وەبەرهێنان لەو غازەی دەسوتێت، نۆژەنکردنەوە و فراوانکردنی کارەکانی کۆمپانیای غازی باکوور و بونیادنانی وێستگەیەکی کارەبا بە توانای 400 مێگاواتە.

- ڕەخساندنی هەلیکار بۆ دەستیکار و کۆمپانیاکانی ناوخۆ، گەشەپێدانی توانا ئەندازیاریی و هونەرییەکان، ڕاهێنان و پشتیوانی بۆ کارمەندانی کۆمپانیاکانی نەوت و غازی باکوور  بەشێكی دیکەن لە سوودەکانی ئەم ڕێککەوتنە.