پارتی و یەکێتی لەبارەی دابەشکردنی پۆست و وەزارەتەکان دەست بە گفتوگۆ دەکەن

ئاڤا نیوز

پارتی و یەکێتی لەبارەی دابەشکردنی پۆست و وەزارەتەکان دەست بە گفتوگۆ دەکەن، سبەی جارێکی دیکە لەسەر ئاستی باڵا لەبارەی پێکهێنانی حکومەت کۆدەبنەوە و یەکێتی داوای چەند وەزارەتێک دەکات.

وێنە گەورەکە: سبەی شاندی دانوستانکاری پارتی و یەکێتی جارێکی دیکە بۆ گفتوگۆکانی پێکهێنانی حکومەت کۆدەبنەوە، گفتوگۆکردن لەبارەی دابەشکردنی پۆست و وەزارەتەکان دەستپێدەکات.

لێدوانی فەرمی: مەحموود محەممەد، وتەبێژی پارتی دیموکراتی کوردستان بە ئاڤا میدیای ڕاگەیاند:

- سبەی لەسەر ئاستی باڵا، پارتی و یەکێتی لە هەولێر کۆدەبنەوە، لە کۆبوونەوەکانی ڕابردوو نزیکبوونەوەی زۆر دروستبووە لەنێوانمان، لەسەر چەندین پرس و خاڵ ڕێککەوتووین.

- لە کۆبوونەوەی سبەیش ئەو خاڵانەی ماون گفتوگۆیان لەبارەوە دەکرێت، ئومێد دەکەین دوای کۆبوونەوەکە زانیاری باش و دڵخۆشکەر بدەین بە خەڵک و بە زووترین کات کابینەی نوێ پێکبهێنرێت.

لەلایەکی دیکەوە: پێشتر سەعدی پیرە، وتەبێژی یەکێتی ڕایگەیاندبوو، ئەگەر لە دابەشکردنی پشک و پۆستەکان شاندی دانوستانکار نەگەیشتن بە ڕێککەوتن، ئەوا لەسەر ئاستی لووتکەی هەردوو حیزب کۆبوونەوە دەکرێت و بڕیاری لەبارەوە دەدرێت.

زانیاریی تایبەت: لەمبارەیەوە مەحموود محەممەد بە عوبەید بەشار، پەیامنێری ئاڤای وتووە، ئەو بابەتەش واتە کۆبوونەوەی لووتکە، لە کۆبوونەوەکەی سبەی بڕیاری لەسەر دەدرێت.

زانیاریی بەدەستهاتوو: ئاڤا زانیویەتی یەکێتی لە کابینەی 10 چاوی لە وەزارەتەکانی (ناوخۆ، شارەوانی، سامانە سروشتییەکان، دارایی)ـیە، بەڵام دیار نیە لەم وەزارەتە سیادییانە چەندی پێدەدرێ.