فایلی خەڵک؛ کەسوکاری شەهیدان و ئەنفالکراوانی شەقڵاوە لەڕێگەی ئاڤاوە داواکارییان هەیە

ئاڤا نیوز

بەشێک لە کەسوکاری شەهیدان و ئەنفالکراوانی شەقڵاوە داوا دەکەن حکومەت خزمەتگوزاری بگەیێنێتە ئەو 150 خانووەی کە لە میراوە بۆیان دروستکراوە. بەرپرسێکی ئیداریی شەقڵاوەش دڵنیایی دەدات و دەڵێت ڕەزامەندی بۆ گەیاندنی خزمەتگوزاری وەرگیراوە.

چیرۆکی سەرەکی: ژمارەیەک لە کەسوکاری شەهیدان و ئەنفالکراوان لە قەزای شەقڵاوە دەڵێن لە ساڵی 2015ەوە لەلایەن حکومەتی هەرێمی کوردستانەوە 150 خانوو بۆ کەسوکاری شەهیدان و ئەنفالکراوان لە میراوە دروستکراوە و دابەشکراوە، بەڵام ئەوە 10 ساڵە نە خزمەتگوزاری بۆ ڕۆیشتووە و نە لەسەریشیان تاپۆ دەکرێت.

ئەوەی لەوبارەیەوە دەگوترێت: ئەو هاونیشتمانیانە دەڵێن، بەشێک لە خانووەکان بەکرێ دراون و بەشێکی دیکەیان چۆڵن، بەو هۆیەوە خانووەکان کۆن بوون و بەشێکیان مەترسی ڕووخانیان لەسەرە و کەسمان سوودی ئەو تۆمان لێ نەبیینیوە. ئەو هاونیشتمانییانە دەڵێن، چەندین جار سەردانی لایەنە پەیوەندیدارەکانیان کردووە، بەڵام هەرجارە و وەڵامێکی جیاوازیان دەدرێتەوەو بێزاربوون.

لێدوانی فەرمی: کاروان کەریم خان، قایمقامی قەزای شەقڵاوە دەڵێت:

- بۆ قیرتاوکردن و گەیاندنی تۆڕی ئاوی خواردنەوە، بە بڕی زیاتر لە 800 ملیۆن دینار ڕەزامەندی دارایی وەرگیراوە. لەم چەند ڕۆژە بە وەرگرتنی پێشینەیەک و هێوربوونەوەی دۆخی کەشوهەوا قۆناغی یەکەمی قیرتاوکردن و گەیاندنی تۆڕی ئاوی خواردنەوە دەستپێدەکات. 

- ئەنجامدانی ئەو خزمەتگوزارییانە بەشێوەی ڕاستەوخۆیە، واتا لەسەر ئەرکی حکومەتە و تیمەکانی حکومەت جێبەجێی دەکەن و نەدراوەتە کەرتی تایبەت و کۆمپانیا.

- سەبارەت بە تاپۆکردنی خانووەکان، وەزارەتی شەهیدان و ئەنفالکراون بە ئاڤا میدیای ڕاگەیاند: تەنیا ئەو خانووانە نین، بەڵکو لە شارەکانی دیکەش چەندین خانووی دیکە هەمان کێشەیان هەیە. 

- ساڵی ڕابردوو ئەنجوومەنی وەزیران بە نووسراوێک داوایکردووە زانیاری لەبارەی خانوو و شوقەی شەهیدان و ئەو زەویانەشی تاپۆ نەکراون بە لیست بۆیان ڕەوانە بکرێت. ئێستا ئامادە کراوە و هەفتەی داهاتوو بۆ ئەنجوومەنی وەزیرانی دەنێرین و چاوەڕێین لە بەرژەوەندی هەموویان بڕیارێک دەربچێت.