ترەمپ کارتی ئاڵتوونی دەفرۆشێت

 

ئاڤا نیوز

دۆناڵد ترەمپ سەرۆکی ئەمریکا ڕایگەیاند، لە دوو هەفتەی داهاتوودا کارتێکی نوێ بەردەست دەبێت بە ناوی "کارتی ئاڵتوونی" دەبێتە ڕێگایەک بۆ ئەو کەسانەی پارەیان هەیە و دەیانەوێت لە ئەمریکا نیشتەجێ بن و پڕۆژە ئەنجام بدەن.

وێنە گەورەکە: دۆناڵد ترەمپ بەنیازە ڤیزەی نوێی نیشتەجێبوون لە ئەمریکا بەناوی "کارتی ئاڵتوونی" بفرۆشێت بە نرخی 5 ملیۆن دۆلار کە تەنانەت کەسایەتییە دیارەکانی ڕووسیاش ڕەنگە مافی کڕینیان هەبێت.

لێدوانی فەرمی: دۆناڵد ترەمپ سەرۆکی ئەمریکا ڕایگەیاند:

٠ فرۆشتنی ڤیزە نوێیەکە یان کارتی ئاڵتوونی کە وەشانێکی گرانبەهای کارتی سەوزی تەقلیدییە لە دوو هەفتەی داهاتوو بەردەست دەبێت، و دەبێتە هۆی دروستکردنی هەلی کار و دەتوانرێت بۆ کەمکردنەوەی کورتهێنانی نیشتمانی بەکاربهێنرێت و دەبێتە ڕێگایەکی نوێ بۆ بەدەستهێنانی ڕەگەزنامەی ئەمریکا.

٠ خەڵکانێکی زۆر دەیانەوێت لە ئەمریکا بن و کەسانی دەوڵەمەند لەسەر ئاستی جیهان دەتوانن کارتی ئاڵتوونی بکڕن و بێنە ئەمریکا و لێرە هەلی کار بۆ ئەمریکییەکان بڕەخسێنن.

ئەوەی پێویستە بیزانیت: ڤیزەی وەبەرهێنەران لە سەرانسەری جیهاندا باو و ئاساییە، بەگوێرەی ڕاپۆرتەکان زیاتر لە 100 وڵاتی جیهان ئەم جۆرە ڤیزە پێشکەش بە کەسانی دەوڵەمەند دەکەن، لەوانە بەریتانیا، ئیسپانیا، یۆنان، ماڵتا، ئوسترالیا، کەنەدا و ئیتاڵیا.