پارتی و یەکێتی لەسەر پێکهێنانی حکومەت کۆدەبنەوە

ئاڤا نیوز

کەمێک بەر لەئێستا کۆبوونەوەی پارتی و یەکێتی لە مەکتەبی سیاسیی پارتی لە پیرمام دەستیپێکرد.

وێنە گەورەكە: پارتی و یەكێتی براوەی یەكەم و دووەمی هەڵبژاردنی خولی شەشەمی پەرلەمانی كوردستان بوون، لە گفتوگۆکانیان بۆ پێكهێنانی كابینەی دەیەمی حكومەتی هەرێمی كوردستان بەردەوامن و هەردوولا لە ڕێككەوتنی كۆتایی نزیکبوونەتەوە.

زانیاریی پەیامنێر: کوردستان حەسەن، پەیامنێری دیبلۆماسی ئاڤا میدیا ڕایگەیاند: کۆبوونەوەی نێوان پارتی و یەکێتی لەبارەی کابینەی نوێی حکومەت دەستیپێکردووە، شاندی پارتی لە هۆشیار زێباری، پشتیوان سادق، دڵشاد شەهاب، د. ئومێد سەباح پێکهاتووە، هاوکات شاندی یەکێتی لە قوباد تاڵەبانی، ئامانج رەحیم، ڕێواس فایەق، شاڵاو شێخ سەلاح، دەرباز کۆسرەت پێکهاتوون.

ئەوەی پێویستە بیزانیت: کۆبوونەوەکە درێژکراوەی کۆبوونەوەی ڕۆژی شەممەیە، کە هەردوو شاندی دانوستانکاری پارتی و یەكێتی لە سلێمانی كۆبوونەوە و گفتوگۆیان لەبارەی ئەو ڕەشنووس و ڕاپۆرتانە کرد کە ئامادەکراون و هەموو هەوڵەکانیش بۆ پێکهێنانی حکومەتن لە زووترین کاتدا.