پارتی و یەکێتی گفتوگۆی چڕ لەبارەی پێکهێنانی حکومەت دەکەن

ئاڤا نیوز

کۆبوونەوەی پارتی و یەکێتی لەبارەی پێکهێنانی کابینەی نوێی حکومەتی هەرێمی کوردستان کۆتایی هات.

چیرۆکی سەرەکی: ئەمرۆ چوارشەممە 26-2-2025، پارتی و یەکێتی لەبارەی هەنگاوەکانی پێکهێنانی کابینەی نوێی حکومەت لە پیرمام کۆبوونەوە و هەردوولا گفتوگۆیان لەسەر پۆست و سەرۆکایەتییەکان کرد.

زانیاریی پەیامنێر: کوردستان حەسەن، پەیامنێری دیبلۆماسی ئاڤا میدیا ڕایگەیاند: کۆبوونەوەکەی نێوان پارتی و یەکێتی زیاتر لە دوو کاتژمێری خایاند و گفتوگۆی چڕ لەسەر ئەو ڕەشنووس و ڕاپۆرتانە کران کە بۆ پێکهێنانی حکومەت ئامادە کرا بوون.

٠ هەردوولا گفتوگۆیان لەسەر دابەشکردنی پۆستەکان و سەرۆکایەتییەکان کرد.

٠ یەکێتی دەیەوێت وەزارەتی ناوخۆ، وەزارەتی دارایی، سامانە سرووشتیەکان و وەزارەتی شارەوانی وەربگرێت.

٠ پارتی و یەکێتی لەسەر شێوازی ئیدارەدانی هەرێمی کوردستان بۆ کابینەی دەیەم گفتوگۆیان کرد.

٠ ئەمە دوایین کۆبوونەوە نابێت لەسەر پرسی پێکهینانی حکومەت.

زانیاریی زیاتر: دوو ئەندامی شاندی دانوستانکاری پارتی و یەکێتی بە کوردستان حەسەن، پەیامنێری دیبلۆماسی ئاڤا میدیایان گوتووە: کۆبوونەوەکان بەرەپێشوەچوونی باشیان بەخۆیەوە بینیوە و گەشبینین بە پێکهێنانی کابینەی دەیەمی حکومەتی هەریمی کوردستان.