كونسوڵی نوێی ئەرمینیا لە هەرێمی كوردستان دەستبەكار دەبێت

ئاڤا نیوز

هەڵسووڕێنەری نوێی كاروباری كونسوڵخانەی گشتیی ئەرمینیا لە هەرێمی كوردستان دەست بەكار دەبێت، لەیەكەم لێدوانیشیدا، خواستی پێشخستنی پەیوەندییەكانی وڵاتەكەی لەگەڵ هەرێمی كوردستان دووپات دەكاتەوە، بەتایبەت لە بوارەكانی بازرگانی و وەبەرهێنان.

وێنە گەورەكە: سەفین دزەیی، بەرپرسی پەیوەندییەكانی دەرەوەی حكومەتی هەرێمی كوردستان پێشوازیی لە ڕەفایل مۆڤسیسیان، هەڵسووڕێنەری نوێی كاروباری كونسوڵخانەی گشتیی ئەرمینیا لە هەرێمی كوردستان كرد و پیرۆزبایی دەستبەكاربوونی لێكرد و پشتیوانی حكومەتی هەرێمی كوردستانی لەپێناو سەركەوتنی لە ئەركەكەیدا دووپات كردەوە.

ڕاگەیێنراوی فەرمی: بەڕێوەبەرایەتیی ڕاگەیاندن و پەیوەندییەكانی فەرمانگەی پەیوەندییەكانی دەرەوە بڵاویكردووەتەوە، لەو دیدارەدا هەردوولایەن خواستەكانیان بۆ پێشخستنی زیاتری پەیوەندییەكانى هەرێمی كوردستان و ئەرمینیا لە بوارە جیا جیاکاندا دووپات كردووەتەوە، به‌ تايبه‌ت لە بواره‌كانى بازرگانى، ئابوورى و وه‌به‌رهێناندا.

بەتەنیشت ئەم بابەتەوە: كونسوڵی نوێی ئەرمینیا، تیشكی خستەسەر ئەو پێشكەوتنە بەرچاوانەی لە پەیوەندییەكانی نێوان هەرێمی كوردستان و ئەرمینیا لەم ساڵانەی دواییدا بەدیهاتوون، هەروەها خواستی یەریڤانی بۆ پەرەپێدانی جووڵە بازرگانییەكانی لەگەڵ هەرێمی كوردستان خستەڕوو، بەشێوەیەك سەرجەم سێكتەرەكان بگرێتەوە.

باكگراوند: هەرێمی كوردستان و ئەرمینیا پەیوەندیی دۆستایەتی و مێژوویی لەنێوانیان هەیە، لەو چوارچێوەیەشدا؛ ساڵی 2017 بڕیاری كردنەوەی كونسوڵخانەی گشتیی ئەو وڵاتە لە هەرێمی كوردستان دەرچوو، بەڵام بەهۆی بڵاوبوونەوەی پەتای كۆرۆنا، كردنەوەی كونسوڵخانەكە دواكەوت بۆ مانگی ئازاری ساڵی 2021.