شاندی دەم پارتی پەیامەکەی سەرۆک بارزانی بە ئۆجەلان دەگەیێنن

ئاڤا نیوز

سبەی شاندی دەم پارتی جارێکی دیکە سەردانی ئیمراڵی دەکەن و چاویان بە عەبدوڵڵا ئۆجەلان دەکەوێت، شاندەکە پەیامی سەرۆک بارزانیش دەگەیێنن بە ئۆجەلان و قسەی کۆتایی لەبارەی پرۆسەی ئاشتی لێ وەردەگرن.

وێنە گەورەکە: وەزارەتی دادی تورکیا، ڕێگەپێدانی بۆ سەردانیکردنی شاندی دەم پارتی بۆ ئیمراڵی دەرکرد و سبەینێ شاندەکە بۆ جاری سێیەم چاویان بە عەبدوڵڵا ئۆجەلان، ڕێبەری پەکەکە دەکەوێت، شاندی ئەمجارەی حکومەت لە حەوت کەس پێکدێت کە پێشتر سێ کەس بوون.

ئەوەی پێویستە بیزانیت: ڕۆژی 28ی ئەم مانگە کە دەکاتە ڕۆژی هەینی چاوەڕوان دەکرێت بانگەوازەکەی ئۆجەلان بڵاوبکرێتەوە، کە دوایین قسەی ئۆجەلان دەبێت لەسەر پرۆسەی ئاشتی و چەکدانانی پەکەکە.

ئەمەش بزانە: بانگەوازەکەش بە نووسراو دەبێت و ڤیدیۆیی نابێ، لەلایەن پارێزەرێکی ئۆجەلان یاخود یەکێک لە ئەندامانی شاندەکە بڵاودەکرێتەوە.

زانیاریی زیاتر: سەرجەم پەرلەمانتارانی دەم پارتی لە کاتی بڵاوکردنەوەی ڕاگەیێنراوەکە لە ئەنقەرە ئامادە دەبن و لە کۆنگرەیەکی ڕۆژنامەوانییدا بانگەوازەکەی ئۆجەلان دەخوێنرێتەوە.