وەزیری بەرگریی عێراق: پەکەکە ڕێکخراوێکی تیرۆریستییە و ھەڕەشەیە بۆ سەر عێراق

ئاڤا نیوز

وەزیری بەرگریی عێراق ڕایدەگەیێنێت، پەکەکە ڕێکخراوێکی تیرۆریستییە و ھەرەشەیە بۆ سەر عێراق و هەرێمی کوردستان. ئاماژە بۆ ئەوەش دەکات، نەهێشتنی پەکەکە پێویستی بە بڕیارێکی یەکگرتووی سیاسی لەنێوخۆدا هەیە.

 

لێدوانی ڕۆژنامەوانی: سابت عەباسی، وەزیری بەرگریی عێراق لە دیدارێکی تایبەتدا لەگەڵ کەناڵی حەدەس ڕایگەیاند: لەبارەی دۆسیەی پەکەکە ڕێککەوتنێکی ئەمنیمان لەگەڵ تورکیا واژۆ کردووە، دوای ئەوەی ئەو ڕێککەوتنەمان خستە بەردەم ئەنجوومەنی ئاسایشی نیشتمانی و ئەنجوومەنی وەزیران، پەسندکرا و هەندێک هەمواری تێدا کراوە و بۆ لایەنی تورکیامان ناردووەتەوە، چاوەڕێی وەڵامی لایەنی تورکیاین.

 

زانیاریی زیاتر: سابت عەباسی دەشڵێت، مامەڵەکردن لەگەڵ دۆسیەی پەکەکە پێویستی بە بڕیارێکی یەکگرتووی سیاسی هەیە و پێویستیش دەکات ئەو بڕیارە بدرێت، چونکە پەکەکە هەڕەشەیان بۆسەر ئێمە بە تایبەت لە ناوچەکانی نەینەوا و کوردستان بوونەتە هەڕەشەیەکی مەترسیدار.

ئەوەی پێویستە بیزانیت: "حکومەتی عێراق پەکەکەی وەک ڕێکخراوێکی تیرۆریستی ناساندووە و بارەگاکانیشی بە بڕیاری ئەنجوومەنی باڵای دادوەری داخستووە، بەڵام بڕیاری سیاسی بۆ چارەسەرکردنی یان شەڕکردن لە دژیان، پێویستی بە بڕیاری سیاسیی نێوخۆیی هەیە لەلایەن سەرجەم لایەنەکانەوە".

بە تەنیشت ئەم بابەتەوە: سەبارەت بە هەڕەشەی هێرشکردنە سەر کوردستان لەلایەن ئێرانەوە بۆ لێدان لە پارتە ئۆپۆزسیۆنەکانی ئێران. سابت عەباسی دەڵێت: زمانی هەڕەشە ڕەتدەکەینەوە، ڕێگەش نادەین خاکمان بەکاربهێنرێت لە دژی هیچ یەکێک لە وڵاتانی دراوسێمان، لە هەمان کاتدا ڕێککەوتنی ئەمنی لەنێوان بەغدا و تاران هەیە و لە بواری جێبەجێکردندایە، لە ڕێگەی ئەو ڕێککەوتنەوە دەتوانین کێشەکان چارەسەر بکەین.