ڕۆژمێری كشتوكاڵی هەرێمی كوردستان دادەنرێت

ئاڤا نیوز

لەچوارچێوەی پلانی ستراتیژی بۆ پاراستنی بەرهەمە خۆماڵییەكان، حكومەتی هەرێمی كوردستان بەردەوامە لە جێبەجێكردنی بڕیاری قەدەغەی هاوردەكردنی بەرهەمی هێلكەی خواردن، ئەوەش بۆ پاڕێزگارییە لە بەرهەمی پڕۆژە و كێڵگە پەلەوەرییەكان.

وێنە گەورەكە: ئەمڕۆ چوارشەممە 26-2-2025، بە سەرپەرشتی بریكاری وەزارەتی كشتوكاڵ و سەرچاوەكانی ئاوی هەرێمی كوردستان و بەئامادەبوونی نوێنەری دیوانی سەرۆكایەتیی ئەنجومەنی وەزیران و ڕاوێژكاران و بەڕێوەبەریی گشتیی سامانی ئاژەڵ و ڤێتێرنەری و ژمارەیەك بەڕێوەبەری دیكەی وەزارەتی كشتوكاڵ، کۆبوونەوەی لیژنەی ڕۆژمێری کشتوکاڵی بەرێوەچوو.

ڕاگەیێنراوی فەرمی: وەزارەتی كشتوكاڵ و سەرچاوەكانی ئاوی هەرێمی كوردستان بڵاویكردووەتەوە، لەو كۆبوونەوەیەدا، تاوتوێی جێبەجێکردنی خشتەی ڕۆژمێری كشتوكاڵی و بابەتی پارێزگاری لەبەرهەمی پڕۆژە کشتوکاڵییە خۆماڵییەکانی هەرێمی کوردستان کراوە و جەختکرایەوە لەسەر بەردەوامبوونی بڕیاری قەدەغەی هاوردەکردنی بەرهەمی هێلکەی خواردن، بۆ مەبەستی پارێزگاری لەبەرهەمی پڕۆژە و کێلگە پەلەوەرییەکانی هەرێمی كوردستان.

بابەتە ستراتیژییەكە: حكومەتی هەرێمی كوردستان بە هەماهەنگی و كاری پێكەوەیی دامەزراوەکانی، لەپێناو تێركردنی پێویستییەکانی ناوخۆی هەرێمی کوردستان و هەنگاونان بۆ چارەسەرکردنی کێشەی بەبازاڕکردن و بەدیهێنانی خۆبژێوی و پشتبەستن بە بەرووبوومی خۆماڵی، كار بۆ ساغكردنەوەی بەرهەمە خۆماڵییەكان دەكات، ڕێگریكردن لە هاوردەكردنی بەرهەمی وڵاتانی بیانی بەشێكە لە چوارچێوەی جێبەجێكردنی پلانەكە.