لە دهۆك كاریگەریی ژیری دەستكرد لەسەر كۆمەڵگە  تاوتوێ دەكرێت

ئاڤا نیوز

لە شاری دهۆك دوو زانكۆی كوردستانی ژمارەیەك پانێڵ لەبارەی ژیری دەستكرد و كاریگەرییەكانی لەسەر كۆمەڵگە ڕێكخست، تێیدا ژمارەیەك ئەكادیمیست سەرنج و بۆچوونەكانیان لەبارەی دیوە ئەرێنی و نەرێنییەكانی خستەڕوو.

چیرۆكی سەرەكی: بە دروشمی (زیرەكی دەستكرد، كۆمەڵگە ئایندەمانە) هەردوو زانكۆی پۆلیتەكنیكی دهۆك و زانكۆی كاسۆلیكیی هەولێر بە هاوبەشی، سەمپۆزیۆمێكیان لەبارەی ژیری دەستكرد ڕێكخست، بە ئامادەبوونی ڕاوێژكارێکی وەزارەتی خوێندنی باڵا و توێژینەوەی زانستی و ژمارەیەك ئەكادیمیست و پسپۆڕانی بواری زانستە جۆراوجۆرەكان.

لێدوانی فەرمی: دكتۆر ئەمیر عەبدولڕەحمان، ڕاوێژكاری وەزارەتی خوێندنی باڵا و توێژینەوەی زانستی بە ماڵپەڕی فەرمی وەزارەتەكەی ڕاگەیاندووە، ڕێكخستنی ئەمجۆرە چالاكییانە هەنگاوێكی گرنگ و پێویستە بۆ ئاشناكردنی ژیری دەستكرد 'ئەی ئای' بە كۆمەڵگە و دەستخۆشی لە هەردوو زانكۆی پۆلیتەكنیكی دهۆك و زانكۆی كاسۆلیكیی هەولێر دەكات كە بەهاوبەشی ئەو هەنگاوە گرنگەیان ناوە، بەتایبەت كە بۆ پێشخستنی كۆمەڵگەی كوردستانی لەئێستادا پێویستە.

قووڵتر: سەمپۆزیۆمەكە ژمارەیەك سیمیناری لەبارەی: (ئەی ئای و سنوورەكەی)، (ئەی ئای و بەستەرە پەیوەستەكانی ئەم بوارە)، (سوود و مەترسییە پێشبینیكراوەكانی ئەی ئای بۆ كۆمەڵگە) (ئەی ئای و سەرنجێكی وردتر: ڕۆڵ و كاریگەری بەسەر دونیای واقعیدا) لەلایەن كەسانی پسپۆڕ و خاوەن بڕوانامەی بەرزی بواری زانستی پێشكەشكران، لە كۆتایشدا بڕوانامەی ڕێزلێنان بەخشرایە پانێڵیست و پێشكەشكارانی سیمینارەكە.

بۆچی گرنگە: ئێستا ژیری دەستكرد بووەتە بابەتێكی گەرمی ڕۆژ، سەرەڕای دیوە ئەرێنی و سوودەكانی بۆ مرۆڤایەتی، ئێستا مەترسییەكانی ئایندەی ژیری دەستكرد گەیشتووەتە ئاستی گفتوگۆی سەركردەی وڵاتان و لە ناوەندە جیهانییەكان مەترسییە پێشبینیكراوەكانی زیرەكی دەستكرد باسی لێوە دەكرێت، بەتایبەت كە ئەم بوارەش كەوتووەتە خزمەتی پیشەسازی و تەكنەلۆژیای جەنگ و وڵاتان لە گۆڕەپانی شەڕ پەنای بۆ دەبەن.