بازرگانێکی ئیسرائیلی کە سیخوڕی بۆ ئێران کردووە بە 12 ساڵ زیندانی سزا درا

ئاڤا نیوز

بە تۆمەتی سیخوڕی کردن بۆ کۆماری ئیسلامی ئێران و پیلانگێڕان بۆ کوشتنی بەرپرسانی ئیسرائیل لەوانە سەرۆک وەزیران و وەزیری بەرگری، بازرگانێکی ئیسرائیلی بە 12 ساڵ زیندانی سزا درا.

چیرۆکی سەرەکی: هاووڵاتییەکی ئیسرائیلی تەمەن 73 ساڵ بەناوی "مۆتی مامان"، تۆمەتبارکراوە بە قسەکردن لەگەڵ کاربەدەستانی ئێرانی سەبارەت بە پارەدارکردنی ئۆپەراسیۆنە تیرۆریستییەکان لە دژی ئیسرائیل و کۆکردنەوەی زانیاری بینراو لەسەر ئامانجەکانی ئیسرائیل و دروستکردنی گروپی تیرۆریستی لە ڕووسیا و ئەمەریکا بۆ بە ئامانجکردنی نەیارانی ئێران.

ڕاگەیێنراوی فەرمی: نووسینگەی داواکاری گشتی ئیسرائیل ڕایگەیاند: "مۆتی مامان" لە دوای 14 لێپرسینەوە لە دەزگای هەواڵگری و ئاسایشی ناوخۆ و چوار لێکۆڵینەوەی تری پۆلیس دانی بەو تۆمەتانەدا ناوە.

زانیاری زیاتر: لە ساڵی ڕابردوودا شەپۆلی دەستگیرکردنی سیخوڕی سەر بە حکومەتی ئێران لە ئیسرائیل بەشێوەیەکی بەرچاو زیادیکردووە و تەنها لە مانگی 10 شەش تۆڕی سیخوڕی کۆماری ئیسلامی کە ئەندامەکانیان خەڵکی ڕووسیا و ئازەربایجان بوون لە ئیسرائیل دەستگیرکراون.