مشکەکانیش وەکو مرۆڤ کاری بوژانەوەی دڵ و سییەکان دەکەن

ئاڤا نیوز

لە تاقیکردنەوەیەکی زانستیدا دەردەکەوێت مشکێک کاری بوژانەوی دڵ و هەناسەدانی دەستکرد بۆ مشکێکی دیکەی بێهۆش دەکات.

چیرۆکی سەرەکی: لە زانکۆی کالیفۆرنیا لە ئەمریکا مامۆستایەک بەناوی "لی ژانگ" و تیمێکی هاوڕێی دوو مشکی ماڵییان خستە نێو سندوقێکی شووشەوە، کە یەکێکیان لەڕێگەی دەرمانەوە بێهۆشکرابوو و ماوەی 13 خولەک چاودێرییان کردن. مشکەکە نیوەی کاتەکەی بە چاودێریکردنی مشکە بێهۆشکراوەکە بەسەر برد، تیمەکە سەرنجیان دا سەرەتا مشکەکە بە بۆنکردنی مشکە بێهۆشەکە دەستی پێکرد، پاشان لێدان و گازگرتن و هەڵسوکەوتی تووندی فیزیکی و ئینجا کردنەوەی دەمی و دەرهێنانی زمانی، ئەمەش هاوشێوەی کردنەوەی بۆری هەوایە، کە یەکەم هەنگاوە لە " CPR"ـی مرۆڤدا، واتە "بوژانەوەی دڵ و سییەکان".

زانیاریی زیاتر: ژانگ و تیمە لێکۆڵەرەکە دوای بینینی ئەم ڕەفتارانە تاقیکردنەوەیەکی دیکەیان کرد، چەند مشکێکیان بێهۆشکرد و تۆپی لاستیکییان خستە دەمییانەوە، سەرنجیان دا 80%ـی مشکە چارەسەرکارەکان تۆپەکان لە دەمی مشکە بێهۆشەکان دەهێننە دەرەوە.

قووڵتر: چالاکیی دەماریی مشکەکان دەریدەخات ئەم ڕەفتارانە لە ئەنجامی دەردانی هۆرمۆنی "ئۆکسی تۆسین"ـە لە مێشکدا، کە پەیوەندی بە خەمخۆری، خۆشەویستی و هاوسۆزیەوە هەیە.