لە زاخۆ خانوو و شوقە بەسەر کەمدەرامەتان دابەشدەکرێت

ئاڤا نیوز

لە مانگی ڕەمەزاندا لە زاخۆ 30 خانوو شوقە دەدرێتە خەڵکی هەژار و کەمدەرامەت. هەروەها هاوکاری دارایی بەسەر پێنج هەزار کەسدا دابەشدەکرێت.

وێنە گەورەکە: ماوەی چەند ساڵێکە، لە مانگی پیرۆزی ڕەمەزاندا، ئیدارەی سەربەخۆی زاخۆ لە چەندین بواردا جیاوازتر دەردەکەوێت. بۆ ڕەمەزانی ئەمساڵیش بڕیارە وەک ساڵانی ڕابردوو خانوو شووقە بەسەر خەڵکی هەژار و کەمدەرامەت دابەش بکرێت.

ئەوەی پێویستە بیزانیت: بۆ ئەمساڵ 30 خانوو و شووقە ئامادە کراون. ئەمە جگە لە هاوکاری دارایی کە بڕیارە بدرێتە نزیکەی پێنج هەزار کەس. هاوکات کرێی خوێندنی 100 قوتابی کەمدەرامەتی زانکۆی زاخۆش دەدرێت.

ئەمەش بزانە: هەر لە زاخۆ بازارێک کراوەتەوە کە 60 کۆمپانیا تێیدا بەشدارن و هەموویان بە نرخی کارگە کەلوپەلەکانیان دەفرۆشن، هاوکات ئەو هاونیشتمانییانەی دەیانەوێت بچن بۆ بازاڕی کردن لە هەموو گەڕەکەکان پاسی خۆڕایییان بۆ دابین کراوە. ئەم کارە خێرخوازییانە سەموونخانە و نانەواخانەکانیش دەگرێتەوە کە 30 نانەواخانە بڕیاریان داوە نان و سەموون بە خۆڕایی دابەش بکەن.

زانیاریی زیاتر: ئەم هاوکارییانە لەسەر ڕاسپاردەی سەرۆکوەزیران مەسرور بارزانی دەکرێت و بە سەرپەرشتی ڕاستەوخۆی گوهدار شێخۆ سەرپەرشتیاری ئیدارەی سەربەخۆی زاخۆ دەبێت.