وەزارەتی كارەبا: پرۆژەی دابینکردنی کارەبای 24 کاتژمێری سەركەوتوو بووە

ئاڤا نیوز

وەزارەتی كارەبای حكومەتی هەرێمی كوردستان، سەبارەت بە پڕۆژەی دابینكردنی كارەبای 24 كاتژمێری ڕوونكردنەوە دەدات و جەخت دەكاتەوە كە پڕۆژەكە سەركەوتوو بووە.

وێنە گەورەکە: پڕۆژەی ڕووناکی یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، ماوەی زیاتر لە شەش مانگە دەستیپێکردووە و لە تەواوی شارەکانی هەرێمی کوردستان دەست بە فراوانکردنی پرۆژەکە دەکرێت، لەو ڕێگەیەوە كارەبای نیشتمانی دەکرێتە 24 کاتژمێری.

بڵاوكراوەی فەرمی: وەزارەتی كارەبا ڕایگەیاند: 

- لە هەندێ پەیج و ئەکاونتی پلاتفۆرمەکانی سۆشیاڵ میدیا، هەواڵی ناڕاست و چەواشەکارانە بە ناوی وەزارەتی کارەبا و فەرمانگەکانمانەوە لەبارەی دۆخی کارەبا بڵاو دەکرێنەوە.

- وەزارەتی کارەبا تەنیا لە ڕێگەی وتەبێژ و پەیجی فەرمییەوە، زانیاری و داتای پێویست لەبارەی کار و چالاكی و بڕیار و لێدوان و ڕەوشی کارەبا بڵاودەکاتەوە.

- وەزارەتی کارەبا لە ماوەکانی ڕابردوو دەستی بە پرۆژەی دابینکردنی کارەبای 24 کاتژمێری کردووە و لەو شوێنانەی لە پلانەکەی دایە، سەرکەوتوو بووە لە دابینکردنی کارەبای 24 کاتژمێری.

- لە بەرامبەر هەر جۆرە هەوڵێک بۆ بەلاڕێدابردنی ڕای گشتی و پێدانی زانیاریی هەڵە لە بارەی دۆخی کارەبا، ڕێوشوێنی یاسایی دەرهەق بە ئەو کەس و لایەنانە دەگرینەبەر.