زیاتر لە 22 كیلۆگرام حەبی كەپتاگۆن لە سنووری سلێمانی دەستی بەسەردا گیرا

ئاڤا نیوز

هێزەكانی پاسەوانی سنوور، لە سنووری پارێزگای سلێمانی دەستیان بەسەر زیاتر لە 22 كیلۆگرام حەبی هۆشبەری كەپتاگۆندا گرت.

وێنە گەورەكە: جگە لە پاراستنی سنوورەكان، هێزەكانی پاسەوانی سنووری عێراق لەڕێگەی بازگەكانی سەر سنوورەوە ڕێگریی لە هێنانی ماددە هۆشبەرەكان بۆ نێو خاكی هەرێمی كوردستان و عێراق دەكەن، حەبی هۆشبەری كەپتاگۆن یەكێكە لەو ماددە هۆشبەرانەی كە بازرگانانی ماددەی هۆشبەر هەوڵی هێنانی لە ئێران و سووریاوە بۆ هەرێمی كوردستان دەدەن.

وەزارەتی ناوخۆی عێراق ڕایگەیاند:

- هێزەكانی ناوچەی یەكی پاسەوانی سنوور لەسەر سنوور لە پارێزگای سلێمانی دەستیان بەسەر 22.5 كیلۆگرام حەبی هۆشبەر لە جۆری كەپتاگۆندا گرت.

- حەبە هۆشبەرەكان لەنێو 90 كیسە كرابوون و خرابوونە نێو تایەی ئۆتۆمبێلێكەوە و سەرجەمیان ڕادەستی بەشی ماددە هۆشبەرەكانی بەڕێوەبەرایەتیی ئاسایشی سلێمانی كران بەمەبەستی گرتنەبەری ڕێوشوێنی یاسایی.