گۆڕان بۆ پەیامەكەی ئۆجەلان: ئەزموونی 40 ساڵ دەریخست جەنگ لە قازانجی هیچ لایەنێك نییە

 

ئاڤا نیوز

بزوتنەوەی گۆڕان پێشوازی لە پەیامەکەی عەبدوڵڵا ئۆجەلان دەکات و ڕایدەگەیەنێت؛ پەیامەكە زەمینەسازی دەکات بۆ دایەلۆگی سیاسیی و چارەسەرکردنی کێشەکان دوو لە شەڕ و بەکارهێنانی چەک و خوێنڕشتنی زیاتر.

 

وێنە گەورەكە: ڕۆژی پێنجشەممە 2025-02-27، پەیامی عەبدوڵڵا ئۆجەلان، ڕێبەری زیندانیکراوی پەکەکە بڵاوكرایەوە كە داوایكرد، پەكەكە چەک دابنێت و خۆی هەڵبوەشێنێتەوە و کۆنگرە ببەستێت. هاوکات ڕاشیگەیاند، بەرپرسیارێتی ئەم بڕیارە لە ئەستۆ دەگرێت و گەرەنتی گفتوگۆی ئاشتی دەکات.

ڕاگەیێنراوی فەرمی: بزووتنەوەی گۆڕان ڕاگەیێنراوێكی بڵاوکردۆتەوە و تێیدا هاتووە، پەیامی عەبدوڵڵا ئۆجەلان بۆ سەرخستنی پڕۆسەی ئاشتیی لە تورکیا، هاوکاتی پەرەسەندنە سیاسیەکانی ناوچەکە و رۆژهەڵاتی ناوەڕاست؛ زەمینەسازی دەکات بۆ دایەلۆگی سیاسیی و چارەسەرکردنی کێشەکان دوور لە شەڕ و بەکارهێنانی چەک و خوێنڕشتنی زیاتر، کە ئەزمونی 40 ساڵی پێشوو دەریخست جەنگ و ئۆپەراسیۆنە سەربازییەکان لە قازانجی هیچ لایەک نیە.

بزووتنەوەی گۆڕان داواش دەكات هەموو لایەک بە گیانی بەرپرسیارێتیەوە مامەڵە لەگەڵ پەیامی ئاشتیی عەبدوڵا ئۆجەلان بکەن، ئەم هەنگاوەش ببێتە سەرەتای چارەسەرکردنی کێشەکان بە ڕێگەی سیاسیی و بەدەستهێنانی مافە نەتەوەییەکانی کورد لە تورکیا و بەشداریکردن لە پڕۆسەی سیاسیی بە ڕێگەی دیموکراتی و شارستانی.