هاتووچۆی ڕاپەڕین: بۆ ڕاییکردنی مامەڵەکانتان تەنیا کار بە کارتى نیشتمانى دەکرێت

ئاڤا نیوز 

بـەڕێوەبـەرایەتیی هاتووچۆی ڕاپـەڕین ئـاگـاداری سـەرجەم هـاووڵاتـییـان دەکاتەوە لە ڕۆژی یەکشەممەوە تەنیا کار بە کارتی نیشتیمانی دەکرێت بۆ ڕاییکردنی مامەڵەکانیان.

وێنە گەورەکە: دوای گۆڕینی ناسنامەی باری کەسیی بۆ کارتی نیشتیمانی، سەرجەم دام و دەزگاکانی حکومەت پشت بە کارتی نیشتیمانی دەبەستن، ناسنامەی باری کەسیی و ڕەگەزنامەی عێراقی کاری پێناکرێت، هاوتووچۆی ڕاپەڕینیش لە دواین بڕیاریدا کارتی نیشتیمانی کردە پێوەر بۆ ڕاییکردنی مامەڵەی هاووڵاتییان.

ڕاگەیێنراوی فەرمی: بەڕێوەبەرایەتیی ھاتووچۆی ڕاپەڕین، ڕایگەیاند، یەکشەممەى داهاتوو 2025-03-02، دوامۆڵەتە و چیتر لە مامەڵەى هاوڵاتییاندا جگە لە کارتى نیشتمانى، مامەڵە بە هیچ پێناسێکى دیکە ناکەین، ناسنامەى بارى کەسیى و ڕەگەزنامەى عێراقى، کارى پێناکرێت لە هیچ جۆرە مامەڵەیەکى ناو بەڕێوەبەرایەتییەکەمان.

زانیاریی زیاتر: هاتووچۆی ڕاپەڕین دەڵێت، ئەو هاوڵاتییانەشى مامەڵەى کارتى نیشتمانییان تەواو نەبووە، کار بە (صورة قيدی ئەلیکترۆنی)، دەکرێت، هـیوادارین هـاووڵاتییان پێوەی پابەندبن، چونکە چیتر کار بەو دوو بـەڵـگـەنـامـەیـە نـاکـرێـت بـۆ هـیـچ مـامـەڵـەیەکی نـێـو بـەڕێـوەبـەرایـەتـیـمـان.

لە لایەکی دیکەوە: ئەحمەد مەعموری، بەڕێوەبەری گشتیی فەرمانگەی کارتی نیشتیمانی لە وەزارەتی ناوخۆ بە ئاژانسی فەرمی عێراقی ڕاگەیاندووە، لەکۆی 45 ملیۆن و 407 هەزار دانیشتووی وڵات، 42 مليۆن و 81 هەزار کەس کارتی نیشتیمانییان دەرکردووە، تەنیا ساڵی ڕابردووش 8 ملیۆن و 848 هەزار هاووڵاتی بوونەتە خاوەن کارتی نیشتیمانی.