حەسەن تۆران: حکومەتەکەی هۆتێل ڕەشید لە بەڕێوەبردنی کەرکووک شکستی هێناوە

ئاڤا نیوز

سەرۆکی بەرەی تورکمانی دەڵێت، ئیدارەی نوێی کەرکووک لە بەڕێوەبردنی کاروباری پارێزگاکە و پێشکەشکردنی خزمەتگوزارییە بنەڕەتییەکاندا "شکستی هێناوە"، جەختیش دەکاتەوە کە تورکمان لەو حکومەتەدا پەراوێزخراوە.

وێنە گەورەکە: هەرچەندە دادگای کارگێڕیی عێراق پێکهێنانی حکومەتی کەرکووکی بە یاسایی ناساندووە، بەڵام تائێستا پارتی و تورکمان و بەشێک لە فراکسیۆنەکانی پێکهاتەی عەرەبی لە بایکۆتکردنی کۆبوونەوەکانی ئەنجوومەنی پارێزگای کەرکووک بەردەوامن.

لێدوانی فەرمی: حەسەن تۆران، سەرۆکی بەرەی تورکمانی عێراق لە پەیامێکدا بەبۆنەی مانگی ڕەمەزانەوە ڕایگەیاند:

٠ مانگی ڕەمەزان دەرفەتێکە بۆ بەهێزکردنی گیانی پێکەوەبوونی کۆمەڵایەتیی و مرۆیی و پتەوکردنی یەکگرتوویی ڕۆڵەکانی وڵات.

٠ کەرکووک ئیدارەیەکی ناشەرعیی هەیە کە لەگەڵ بنەماکانی ڕێککەوتن و هاوبەشی یەکناگرێتەوە و گەلی تورکمانی پەراوێزخستووە، بۆیە ئێمە ئەو ڕەفتارانە ڕەتدەکەینەوە کە دژی دیموکراسیی و دادپەروەریین.

٠ حکومەتی "هۆتێل ڕەشید" لە بەڕێوەبردنی کاروباری کەرکووک شکستیهێناوە و نەیتوانیوە خزمەتگوزاریی بنەڕەتی پێشکەشی هاووڵاتیان بکات، ئێمە داوای هاوبەشی ڕاستەقینە دەکەین کە ڕەنگدانەوەی ئیرادەی هەموو پێکهاتەکانی کەرکووک بێت.