وەزارەتی پەروەردە ئەو مامۆستا و فەرمانبەرانە ئاگادار دەكاتەوە کە فەرمانی زەوییان بۆ دەرچووە

 

ئاڤا نیوز

وەزارەتی پەروەردە سەرجەم ئەو مامۆستا و فەرمانبەرانەی كە فەرمانی پێدانی زەوییان بۆ دەرچووە، ئاگادار دەكاتەوە كە ئەگەر هەڵە لە ناو یاخود هەر تۆمارێكی دیكەیان هەیە، لەزووترین كاتدا لایەنی پەیوەندیداری لێ ئاگاداربكەنەوە بۆ ئەوەی زانیارییەكانیان ڕاست بكرێتەوە.

وێنە گەورەكە: زیاتر لە 240 هەزار فەرمانبەری حكومەتی هەرێمی كوردستان فەرمانی دابەشكردنی زەوییان بۆ دەرچووە، لەكاتی گەڕانەوەی ناوەكان، بەشێك لە زانیاریی ناوی سیانی و زانیارییەكانی دیكەی پەیوەست بە بەشێك لە فەرمانبەران هەڵە و كەموكوڕی تێدابوو، وەزارەتی شارەوانی بەپێویستی دەزانێت بۆ دەستپێكردنی ڕێكارەكانی تۆماركردنی كارتی زەوی بەناوی فەرمانبەرە سوودمەندبووەكان، كەموكوڕی و هەڵەی نێو زانیارییەكان لەماوەیەكی دیاریكراودا، چاكبكرێتەوە.

نووسراوی فەرمی: بەپێی نووسراوێكی فەرمی وەزارەتی پەروەردە كە وێنەیەكی لای ئاڤا پارێزراوە بە ژمارە 5947 لە 2025-02-26، بە واژۆی ڕەگەز ڕەشید، بەڕێوەبەری گشتیی دیوان دەرچووە، تێیدا هاتووە؛ هەر فەرمانبەر و مامۆستایێكی سەر بە میلاكی پەروەردە كە ناوی بۆ وەرگرتنی زەوی دەرچووە، ئەگەر هەر هەڵەیەك لە تۆماركردنی ناوی یاخود هەر داتایێكی دیكەی هەبێت ئەوا لەڕێگەی خشتەیێكەوە كۆدی ناوی خۆی و زانیارییەكانی بەڕاستكردنەوەوە بۆیان ڕەوانە بكات تاوەكو لەلایەن تیمە تەكنیكییەكانی دیوانی وەزارەتی پەروەردە زانیارییەكانیان چاكبكرێتەوە.

زانیاریی زیاتر: لە نووسراوەكەی وەزارەتی پەروەردە ئاماژە بەوەشكراوە هەر فەرمانبەرێك شایستەی پێدانی زەوییە، بەڵام بەهۆی نەناردنی فۆرمی زانیارییەكانی یاخود بەهۆی ڕوودانی هەڵەیەكەوە، لێی بێ بەش بووە، ئەوا لەماوەی 10 ڕۆژ فۆرمەكان بگەیەننە وەزارەتی پەروەردە تاوەكو ڕەوانەی وەزارەتی شارەوانی بكرێت و لەڕێگەی ئەنجوومەنی شارەوانییەوە بڕیار لەسەر پێدانی زەوی بۆ فەرمانبەرانی شایستە دەربچێت.