سەرۆکوەزیران بەرەو داڤۆس بەڕێکەوت

ئاڤا دیجیتاڵ

سەرۆکوەزیران بارزانی بۆ بەشداریکردن لە کۆڕبەندی ئابووریی جیهانی بەرەو داڤۆس بەڕێکەوت، لە پەراوێزی کۆڕبەندەکەدا چەندین دیدار و گفتوگۆی لەگەڵ چەندین سەرکردە و کەسایەتیی جیهان دەبێت. 

 

بۆچی گرنگە: سەرۆکوەزیران بارزانی لە کۆڕبەندەکەدا پتەوکردنی پەیوەندییەکانی هەرێمی کوردستان لەگەڵ وڵاتانی جیهان و ئەو پرسانەی کە پەیوەندییان بە ئاییندەی عێراق و ناوچەکە بە گشتی هەیە، تاوتوێ دەکات. 

 

ئەوەی ئێستا ڕوودەدات: سەرۆکوەزیران بارزانی ئەمڕۆ دووشەممە 15-01-2024 بە سەرۆکایەتیی شاندێک بۆ بەشداریکردن لە کۆڕبەندی ئابووریی جیهانی لە داڤۆس، بەرەو سویسرا بەڕێکەوت.

 

لەلایەکی دیکەوە: شاندی هەرێمی كوردستان لە ژمارەیەک لە بەرپرسانی حکومی و وەبەرهێنەر و خاوەنکارانی کوردستان پێکهاتووە کە یەکەمجارە بەشداری لە داڤۆس دەکەن، هەروەها بە دەستپێشخەری و ڕاسپاردەی سەرۆکوەزیران بارزانی، ماڵی کوردستان لە داڤۆس دەکرێتەوە.  

 

شێوازی جێبەجێکردن: کۆڕبەندەکە ئەمساڵ لە ژێر ناونیشانی (بونیادنانەوەی متمانە) دەبەسترێت و چەندین تەوەری تایبەت بە وزە و سیستەمی بانکی و ژیری دەستکرد و چەند پرسێکی سیاسی هەنووکەیی، گفتوگۆیان لەبارەوە دەکرێت.

 

ئەوەی پێشبینی دەکرێت: سەرۆکوەزیران بارزانی لە پەراوێزی بەشداریکردنی لە کۆڕبەندی ئابووریی جیهانیی داڤۆس، لەگەڵ ژمارەیەک لە سەرۆک و سەرۆکوەزیران و بەرپرسانی باڵای وڵاتانی ڕۆژهەڵاتی ناوەڕاست و ئەوروپا و جیهان کۆدەبێتەوە.

 

زانیاریی زیاتر: لە دیدارەکانیدا، چەندین تەوەر و پرسی ناوخۆیی و هەرێمی و جیهانی تاوتوێ دەکات، لەوانەش پەرەپێدانی پەیوەندیی دوولایەنە بەتایبەتی لە بوارەکانی ئابووری و وەبەرهێناندا، هەروەها بڕیارە لە پانێلێکیش بەشدار بێت کە تایبەتە بە ململانێ و ناکۆکییەکانی ڕۆژهەڵاتی ناوەڕاست.