وەزارەتی کار: لەمانگی ڕەمەزان هەزاران سەبەتەی خۆراک بەسەر کەمدەرامەتان دابەش دەکرێت

ئاڤا نیوز

 

وەزارەتی کار و کاروباری کۆمەڵایەتی ڕایدەگەیەنێت، بەدرێژایی مانگی ڕەمەزانی پیرۆز، هەزاران سەبەتەی خۆراک بەسەر هاووڵاتییانی کەمدەرامەت دابەشدەکرێت کە ناویان لە تۆڕی هاوکاریی کۆمەڵایەتی تۆمارکراوە، داواش لە سەرمایەدار و خێرخوازان دەکات بۆ ئەو پڕۆژەیە هاوکاریان بن.

 

چیرۆکی سەرەکی: نووسینگەی سلێمانیی وەزارەتی کار و کاروباری کۆمەڵایەتیی حکومەتی هەرێمی کوردستان، ئەمڕۆ لە شاری سلێمانی ژمارەیەک کورسیی کارەبایی بەسەر خاوەن پێداویستە تایبەتەکان دابەشکرد، دواتر لە کۆنگرەیەکی ڕۆژنامەوانیدا، بەرپرسی نووسینگەی وەزیری کار و کاروباری کۆمەڵایەتی لە سلێمانی ئاشکرای کرد، لە مانگی ڕەمەزاندا، شەش هەزار سەبەتەی خۆراک بە سێ قۆناغ بەسەر کەسانی کەمدەرامەت لە خاوەن پێداویستە تایبەتەکان و ماڵە هەژار و کرێچییەکان دابەش دەکرێت.

 

لێدوانی فەرمی: بێستوون جەبار، بەرپرسی نووسینگەی وەزیری کارو کاروباری کۆمەڵایەتی لە سلێمانی ڕایگەیاند، هاوکارییەکان لەلایەن سەرمایەدارانەوە دابینکراوە، داواشی لە هەموو سەرمایەداران کرد کە هاوکاریی کەسانی کەمدەرامەت بکەن.