هەسەدە: توركیا لە 48 كاتژمێری ڕابردوودا 90 هێرشی ئەنجامداوە

 

ئاڤا نیوز

هێزەكانی سووریای دیموكرات ڕایدەگەینێت، لەماوەی 48 كاتژمێری ڕابردوو ژمارەیەك هێرشی توركیایان بەرپەرچداوەتەوە، هاوكات بەهۆی بۆردومانەكانی فڕۆكە جەنگییەكانی ئەو وڵاتەش، پێنج ئەندامیان كوژراون.

چیرۆكی سەرەكی: شەڕ و پێكدادان لە دەوروبەری بەنداوی تشرین و شارۆچكەی قەرەقۆزاك لەنێوان هێزەكانی هەسەدە و گروپە چەكدارەكانی سەر بە توركیا بەردەوامی هەیە، ئەو ناوچانەش بە بەردەوام لەلایەن فڕۆكە جەنگییەكان و تۆپخانەكانی توركیاوە بۆردومان دەكرێن.

ڕاگەیێنراوی فەرمی: میدیای فەرمی هەسەدە ڕایگەیاند، توركیا ماوەی چەند ڕۆژێكە لەڕێگەی فڕۆكەی جەنگی و تۆپخانەكانی، هێرشەكانی بۆ سەر ناوچە جیاجیاكانی باكوور و باكووری ڕۆژهەڵاتی سووریا زیاتر كردووە، بەهۆیەوە زیانی ماددی زۆر بەر دانیشتووانی ئەو ناوچانە كەوتووە.

زانیاریی زیاتر: گروپە چەكدارەكانی سەر بە توركیا، شەوی ڕابردوو هێرشیان كردۆتە سەر خاڵێكی پشكنین لەنزیك ناوچەی سەری تەل و لەلایەن هێزەكانی هەسەدە بەرپەرچدراونەتەوە و لەو شەڕەدا چەكدارێكی میلیشیا چەكدارەكان كوژراوە، هاوكات هێرشێكی دیكە لە میحوەری ئەبو قەلقال ڕوویداو لەئاكامی ئەو پێكدادانەش چوار چەكداری گروپە چەكدارەكان كوژراون و پێنجی دیكەش بریندار كراون، ئەوانی دیكەش هەڵاتوون، هەر شەوی ڕابردوو لە گوندی عەتشانە شەڕ و پێكدادان دروستبووە و سێ چەكداری گروپەكانی نزیك لە توركیا كوژراون.

ژمارەكان وادەڵێن: فرۆكە و تۆپخانەكانی توركیا لەماوەی 48 كاتژمێری ڕابردوودا، 90 بۆردومانیان كردووە و بەهۆیەوە بەشێك لە شوێنی نیشتەجێبوونی ناوچەكانی كۆبانێ و عەین عیسا وێران بوون و پێنج ئەندامیشیان كوژراوە.