لیژنەیەک بۆ نووسینەوەی ڕەشنووسی دەستوورێک بۆ سووریا پێکدەهێنرێت

ئاڤا نیوز

 

بە بڕیاری ئەحمەد شەرع لیژنەیەکی حەوت کەسی بۆ نووسینەوەی ڕەشنووسی دەستوورێک بۆ قۆناغی ڕاگوزەر لە سووریا پێکهێنرا.

 

وێنە گەورەکە: بە بەشداریی 600 کەسایەتی لە پارێزگا جیاوازەکان، سەرلەبەیانی ڕۆژی 25ی شوبات لە کۆشکی کۆماری لە دیمەشق، کۆنگرەی دیالۆگی نیشتمانی سووریا دەستی بەکارەکانی کرد و ئێوارەی هەمان ڕۆژ کارەکانی کۆنگرەکە کۆتاییهات.

 

چی ڕوویدا: لە ڕاگەیێنراوی کۆتایی کۆنگرەکە 18 خاڵ وەک بنەما بۆ حکومڕانی داهاتووی سووریا دیاری کرا، یەکێک لەوانە نووسینەوەی دەستوورێک بوو بۆ قۆناغی ڕاگوزەر لە سووریا.

 

نووسراوی فەرمی: بە گوێرەی نووسراوێکی سەرۆکایەتی کۆماری سووریا، "بە پشتبەستن بە خواستەکانی گەلی سووریا بۆ بوونیادنانی دەوڵەتەکەیان لەسەر بناغەکانی سەروەری یاسا و بە پشتبەستن بە دەرئەنجامەکانی کۆنگرەی دیالۆگی نیشتمانیی سووریا و بە ئامانجی ئامادەکردنی چوارچێوەی یاسایی ڕێکخستنی قۆناغی ڕاگوزەر، سەرۆککۆمار بڕیاردا بە:

 

ماددەی (1) پێکهێنانی لیژنەیەک لەم شارەزایانەی خوارەوە: 

 

 .1 د.عەبدولحەمید عەواک 2. د.یاسر حوێش 3. د.ئیسماعیل خەلفان 4. د.ڕیعان کحیلان 5. د.محەممد ڕەزا جەلخی 6. د.ئەحمەد قوربی 7. د.بەهیە ماردینی.

 

ماددەی (2) ئەرکی لیژنەکە بریتیی دەبێت لە داڕشتنی ڕەشنووسی دەستوور کە قۆناغی ڕاگوزەر لە کۆماری عەرەبی سووریا ڕێکدەخات.

 

ماددەی (3) لیژنەکە پێشنیازی خۆی پێشکەش بە سەرۆکی کۆمار دەکات.