لە قەیسەری هەولێر 137 دووکان ڕادەستی خاوەنەکانیان دەکرێنەوە

ئاڤا نیوز

نۆژەنکردنەوەی بازاڕی قەیسەری هەولێر بەردەوامە و قۆناغ بە قۆناغ دووکانەکان ڕادەستی خاوەنەکانیان دەکرێنەوە.

 

ڕاگەیێنراوی فەرمی: ڕۆژی دووشەممە، پارێزگای هەولێر بڵاویکردەوە: دوای هەشت مانگ لە کارکردن بۆ نۆژەنکردنەوەی بازاڕی قەیسەری، تاوەکو ئێستا 137 دووکان ڕادەستی خاوەنەکانیان کراونەتەوە.

 

زانیاریی زیاتر: بە بڕی پێنج ملیار و 300 ملیۆن دینار، لەسەر بودجەی پارێزگاری هەولێر بازاڕی قەیسەری نۆژەن دەکرێتەوە.

 

لەلایەکی دیکەوە: بەگوێرەی بڵاوکراوەکەی پارێزگای هەولێر، بەشە مێژوویەکەی بازاڕی قەیسەری پێش جەژنی ڕەمەزان تەواو دەکرێت و ڕادەستی خاوەنەکانیان دەکرێتەوە. 

 

ئەوەی پێویستە بیزانیت: قەیسەری کۆنی هەولێر 138 دووکان لە نهۆمی ژێرەوە و 55 دوکان لە نهۆمی سەرەوە پێکهاتووە.

 

ئەمەش بزانە: 149 ساڵ پێش ئێستا بازاڕی قەیسەری دروستکراوە، لەبەر ئەوەی شوێنێکی مێژووییە، بە هەماهەنگی یونسکۆ بە شێوازێکی کلاسیک و وەک خۆی نۆژەن دەکرێتەوە.

 

باکگراوند: بازاڕی قەیسەریی هەولێر، یەكێک بوو لەو دەیان بازاڕ و شوێنانەی هەرێمی کوردستان، کە باندێكی سەر بە پەكەكە سوتاندی و بەهۆیەوە سەدان دووكاندار زەرەرمەند بوون.