لە 10 ساڵی ڕابردوودا عێراق 23 هەزار پارچە شوێنەواری گەڕاندووەتەوە

 

ئاڤا نیوز

حکومەتی عێراق لە 10 ساڵی ڕابردوودا نزیکەی 23 هەزار پارچە شوێنەواری لە چەندین وڵاتی جیهانیدا گەڕاندووەتەوە.

وێنە گەورەکە: لە ساڵانی ڕابردوودا، عێراق بەڕێگەی دیپلۆماسیەوە لە چەندین وڵاتانی وەکو فەرەنسا، ئەڵمانیا، بەریتانیا، ئەمریکا و ئیتاڵیا و چەندین وڵاتی دیکەی جیهانی پارچە شوێنەواری گەڕاندووەتەوە.

لێدوانی فەرمی: نەبیل کەریم، دادوەری دادگای لێکۆڵینەوەی ناوەندی لە ئەنجوومەنی باڵای دادوەریی عێراق ڕایگەیاند: لە دەیەی ڕابردوودا، عێراق نزیکەی 23 هەزار پارچەی شوێنەواری گەڕاندووەتەوە، لە ساڵی 2021 ـدا، 17 هەزار پارچە شوێنەواریی لە ئەمریکا گەڕاندووەتەوە، کە بریتی بوون لە خشتی بزماری و پەیکەر و کەرەستەی شارستانییەتە کۆنەکانی عێراق، دوای ئەوەی ئەم پارچانە لە دوای ساڵی 2003 بە قاچاخ برابوون.

زانیاریی زیاتر: لە ساڵی 2021، حکومەتی عێراق تابلێتی گلگامێشی لە ئەمریکا گەڕاندەوە، کە لە مۆزەخانەیەکی واشنتن نمایش کرابوو، دوای ئەوەی دۆسیەیەکی یاسایی تۆمارکرد و سەلمێنرا کە ئەو تابلێتە بە قاچاخ هێنراوەتە ئەو وڵاتە.