فایلی خەڵک؛ خەڵکی خورماڵ لەڕێگەی ئاڤاوە داوایەک لە ئیدارەی ناوچەکەیان دەکەن

ئاڤا نیوز

لە قەزای خورماڵ ئاوەڕۆیەک کە 500 مەتر درێژە، تاوەکو ئێستا 150 مەتری وەک خۆی ماوە و سەری دانەپۆشراوە، بەمەش سیمایەکی ناشیرینی بە ناوچەکە بەخشیوە. خەڵکی ناوچەکە لە ڕێگەی ئاڤاوە داوا دەکەن سەری ئەو ئاوەڕۆیەیان بۆ بگیرێت.

وێنە گەورەکە: لەسەر ڕێگەی نێوان خورماڵ - ئەحمەد ئاوا ئاوەڕۆیەک هەیە کە درێژیەکەی 500 مەترە  و تاوەکو ئێستا شارەوانی خورماڵ توانیویەتی 350 مەتری داپۆشێت، بەڵام 150 مەتری بەسەربەتاڵی ماوەتەوە، ئاوەڕۆکە سیمایەکی ناشرینی بەڕێگاکە بەخشیوە و بۆنێکی ناخۆشیشی بەو ناوە بڵاوکردۆتەوە.

لێدوانی فەرمی: ئەمین حاجی، چالاکوان و ڕۆژنامەنووسێکی دیاری هەورامانە بۆ ئاڤا گوتی،  ئەم ڕێگایە گرنگییەکی تایبەتی هەیە، چونکە ڕێگەی سەرەکی گەیشتنە بە هاوینەهەواری ئەحمەدئاوا، سەرچاوەی زەڵم و لە وەرزی بەهار و هاویندا ژمارەیەکی زۆر گەشتیار سەردانی دەکەن. هەروەها خەڵکی خورماڵ بۆ پیاسە و وەرزشکردنی شەوانە بەکاری دەهێنن، کەچی ئەم بۆگەنە ناهێڵێ، "بۆیە داوا دەکەین بە زووترین کات سەری بگرن".

لەلایەکی دیکەوە: ئوسامە سەبری، سەرۆکی شارەوانی خورماڵ ڕایگەیاند: لەو 500 مەترە تەنها 150 مەتری ماوە کە سەری بگیرێت، کاری تەواومان لەسەر کردووە و لە نزیکترین کاتدا چاکی دەکەین و ئەو ئاوەڕۆیەش دادەپۆشین.