ئاڤا هۆکاری وەستانی دابەشکردنی نەوت لە سنووری سۆران ئاشکرا دەکات

ئاڤا نیوز

وەزارەتی نەوتی عێراق  50 ملیۆن لیتر نەوتی سپی وەک پشکی هەرێمی کوردستان ناردووە، ماوەیەکە دەست بە دابەشکردنی کراوە و بەهۆی کەمی بڕەکە کە پشکی 19%ـی خێزانەکانی هەرێمی کوردستانە، ئەولەویەت درا بە ناوچە شاخاوییەکان. هەرچەندە بەشێکی لە چۆمان و مێرگەسۆر و  ئەو ناوچانە دابەشکرا، بەڵام ماوەی 11 ڕۆژە لە ئیدارەی سەربەخۆی سۆران پرۆسەکە وەستاوە هەک تانکەریش لە هەولێرەوە بەرەوە سۆران هەڵنەکشاوە.

وێنە گەورەکە: بەگوێرەی ڕێککەوتنی نێوانیان، دەبێت عێراق ساڵانە پشکی هەرێمی کوردستان لە نەوت و وزە دابین بکات، ئەو نەوتەی دەینێرێت لە چوارچێوەی ئەو ڕێککەوتنەیە،  لەو 50 ملیۆن لیترە پشکی پارێزگای هەولێر 15 ملیۆن و 80 هەزار لیتر دیاریکرا، بەگوێرەی ڕێنمایی لە ناوچە شاخاوییەکانەوە بۆ سەنتەری پارێزگاکان درێژ دەبێتەوە و ئامانجەکە ئەوەیە سەرەتا بدرێتە خێزانەکانی ناوچە شاخاوییەکان ئەگەر مایەوە دەگوازرێتەوە سەنتەری شارەکان.

لێدوانی فەرمی: ئەمیر شانەدەری، بەڕێوەبەری نەوت و كانزاكانی ئیدارەی سەربەخۆی سۆران بە ئاڤا میدیای ڕاگەیاند، بەشێکی زۆری خێزانەکانی سنووری قەزاکانی مێرگەسۆر، ڕواندز، خەلیفان و سیدەکان ماون و نەوتیان وەرنەگرتووە، بەهۆی وەستانی پرۆسەکە تاوەکو ئێستا نەوتیان وەرنەگرتووە."

لە لایەکی دیکەوە: ئاڤا بەدواداچوونی زیاتری کرد و لەسەر ئەو پرسە قسەی لەگەڵ وەزارەتی سامانە سرووشتییەکان کرد، گوتیان بەڕێوەبەرایەتی نەوت و کانزاکانمان ئاگادارکردووەتەوە کە تاوەکو ناوچە شاخاوییەکان مابن، نەوت لە دەورووبەر و سەنتەری شارەکان دابەش نەکرێت، هۆکاری وەستانی ناردنی نەوت بۆ ئیدارەی سۆران، کەمی ژمارەی ئەو تانکەرانەیە کە لە بەغداوە دێن، پێشووتر ڕۆژانە 8 تانکەری نەوت ڕەوانە دەکرا، ئێستا 4 بۆ 5 تانکەر دێن."

گوتیشی، "لەدوو ڕۆژی داهاتوو کێشەی ئیدارەی سەربەخۆی سۆران چارەسەر دەبێت و دەست بە ناردنی بڕێکی دیکەی نەوت بۆ ئەو سنوورە دەکەینەوە".

ئەوەی پیویستە بیزانیت: هەر خێزانێک لەو بڕە نەوتەی لە عێراقەوە دێت، 100 لیتری پێدەدرێت.