زیاتر لە حەوت مانگە ئەنجوومەنی پارێزگای کەرکووک بەبێ حەوت لە ئەندامەکانی کۆدەبێتەوە

ئاڤا نیوز

 

ئەنجوومەنی پارێزگای کەرکووک لەسەر خراپی دۆخی کارەبا لە کەرکووک و چەند پرسێکی دیکە کۆدەبێتەوە، وەک کۆبوونەوەکانی پێشوو بەبێ ئامادەبوونی حەوت ئەندامی ناڕازی لایەنەکان دەبێت. سەرۆکی فراکسیۆنی پارتیش لە ئەنجوومەنەکە دەڵێت، "هیچ موبادەرەیەک نییە بۆ بەشداریکردن لە کۆبوونەوەکان."

 

چیرۆکی سەرەکی: زیاتر لە 7 مانگە ئەنجوومەنی پارێزگای کەرکووک هەڵبژێردراوە، تاوەکو ئێستا فراکسیۆنی پارتی دیموکراتی کوردستان، سێ ئەندامی هاوپەیمانی عەرەبی و بەرەی تورکمانی بەشداری کۆبوونەوەکانیان نەکردووە، ئەمەش بەهۆی ڕووداوەکانی 10ـی ئابی هوتێل ڕەشیدی بە‌غدا کە پارێزگار و سەرۆکی ئەنجوومەنی پارێزگا بەبێ ڕەزامەندی بەشێکی لایەنەکان ‌هەڵبژێردران.

 

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا میدیای ڕاگەیاند، "تاوەکو ئێستا هیچ موبادەرەیەک نییە بۆ گفتوگۆ لەسەر بەشداریکردنەوەی فراکسیۆنی پارتی لە کۆبوونەوەی ئەنجوومەنی پارێزگای کەرکووک."

 

باکگراوند: ڕۆژی 10-08-2024 لە هوتێل ڕەشید، ڕێبوار تەها وەک پارێزگاری کەرکووک و محەممەد حافز وەک سەرۆکی ئەنجوومەنی پارێزگا لە بەغدا بەبێ بەشداری ئەندامانی فراکسیۆنی پارتی و ژمارەیەک لە نوێنەرانی عەرەب و تورکمان هەڵبژێردران، ئەمەش کاردانەوەی ئەو لایەنانەی لێکەوتەوە لە دادگەی فیدرالی و دادگەی کارگێڕی سکاڵایان تۆماکرد.