ئاڤا نیوز هۆکاری کەوتنەوەی ئاگرەکەی لەنگەی هەولێر ئاشکرا دەکات

ئاڤا نیوز

لیژنەی لێکۆڵینەوەی ئاگرەکەی لەنگەی هەولێر لەڕێگەی ئاڤا نیوزەوە ئەنجامی کۆتایی ئاشکرا دەکات. قایمقامی هەولێر کە سەرۆکی لیژنەکەیە دەڵێت: بەهۆی کەمتەرخی چەند کەسێک کە کاری کۆسەرەیان بۆ دانانی دوکانێکی نوێ کردووە، ئاگرەکە کەوتووەتەوە.

چیرۆکی سەرەکی: ئێوارەی ڕۆژی چوارشەممە 28-2-2024, ئاگرێکی گەورە لە بازاڕی لەنگەی هەولێر کەوتەوە و بەهۆیەوە زیاتر لە 160 دووکان زیانێکی ماددی زۆریان بەرکەوت، دەستبەجێش لیژنەیەک بۆ لێکۆڵینەوە لە هۆکارەکەی و خەمڵاندنی زیانەکان پێکهێنرا.

لێدوانی فەرمی: نەبەز عەبدولحەمید، قایمقامی هەولێر بە ئاڤا نیوزی گوت:  هۆکارەکەی هیچ سەرپێچییەکی یاسایی یان ڕێنمایی بەرگریی شارستانی و کێشەی کارەبا نەبووە، ئەوەی ڕووی داوە تەنیا کەمتەرخەمی کۆمەڵێک کەس بووە، لێکۆڵینەوەیان لەگەڵ دەکرێت و ڕووبەڕووی سزای یاسایی دەکرێنەوە.

هۆکارە زانراوەکان: بەگوتەی قایمقامی هەولێر، دوای سێ ڕۆژ لێکۆڵینەوە لە هۆکاری ڕاستەقینەی ئاگرەکە و دەستنیشانکردنی لایەنی کەمتەرخەم، بە بەڵگەوە بۆمان دەرکەوت کەسانێک ویستوویانە دووکانی نوێ دابنێن، ڕەفەیان داناوە و کۆسەرەیان بەکارهێناوە، ئاگری کۆسەرەکە تەشەنەی کردووە.

زیانە سەرەکییەکان:  بازاڕی لەنگەی هەولێر زیاتر لە 2 هەزار و 400 دووکان لەخۆدەگرێت، بەگوتەی قایمقامی هەولێر تەنیا 162 بۆ 166 دووکان زیانیان پێگەیشتووە، بەشێکیان تەنیا کێشەی تەڕبوونیان هەبووە, بەشێکی دیکەیان زیانی ئاگری کەم، هەندێکیان سووتانی مامناوەند و ئەوانەیشی لە سەرچاوەی ئاگرەکەوە نزیکبوون بەتەواوی سووتاون.

گۆشەیەکی دیکە: دوای کەوتنەوەی ئاگرەکە گرووپێکی ڕەگەزپەرستی تورک بە ناوی "تەشکیلاتی عەهدی میللی تورک" بەیاننامەیەکیان بڵاوکردەوە و بەرپرسیارێتی ڕووداوەکەیان لەئەستۆگرت، ئەم هەواڵەش بەخێرایی دەزگاکانی ڕاگەیاندنی لە هەرێمی کوردستان تەنی، بەڵام قایمقامی هەولێر دەڵێت: "کەوتنەوەی ئاگرەکە بە ئەنقەست نەبووە و لیژنەکە گەیشتووە بەو ئەنجامەی هیچ دەستێک لە پشت ڕووداوەکەوە نەبووە".  

خاڵە ئەرێنییەکان: لەبارەی قەرەبووی زیانلێکەوتووان قایمقامی هەولێر گوتی: "قەرەبووکردنەوە کۆمەڵێک قۆناغی پێویستە و مەرجی خۆیشی هەیە، بەڵام هەمیشە حکومەت هەوڵدەدات لە کارەساتە سروشتییەکان و ئاگر و زیانەکان هاوکاری هاووڵاتیان بکات و ئەمجارەش هاوکار دەبێت".