ژمارەیەک پۆلیس ماوەی چوار مانگە دامەزراون و تاوەکو ئێستا مووچەیان وەرنەگرتووە

ئاڤا نیوز

ماوەی چوار مانگە ژمارەیەک پۆلیس دامەزراون و تاوەكو ئێستا وەزارەتی دارایی عێراق ڕەزامەندی خەرجكردنی مووچەكەیانی نەداوە. ژمارەیەک لە نوێنەری ئەو پاسەوانانە داوا  لە ئاڤا  دەکەن بەدواداچوون بۆ کێشەکەیان بکات.

ئەوەی پێویستە بیزانیت: ئەو 100 پۆلیسەی کە بە گرێبەست و بە فەرمانی سەرۆكایەتیی دیوانی ئەنجوومەنی وەزیران دامەزران، دوای چوار مانگ لە دەستبەكاربوونیان تا ئێستا یەك مووچەشیان وەرنەگرتووە. ژمارەیەك لەو پۆلیسانە بە نوێنەرایەتی هەر 100 پۆلیسەکە، داوایان لە ئاڤا کردووە بە دەنگیانەوە بچێت و دەنگیان بگەیەنێت.

ئەمەش بزانە: ئەو پۆلیسانە دەڵێن، دوای مەشق و ڕاهێنانی سەربازی بە گرێبەست دامەزراون و چوار مانگە لە ئەركدان، بەڵام لە دۆخێكی زۆر خراپدان، پۆلیسیان تێدایە خێزاندارە و خاوەن منداڵە و كرێچیشە، هیچ كارێكی دیكەی نییە و چاوەڕێی ئەو مووچەیەیە.

زانیاریی تایبەت: سەرچاوەیەك لە بەڕێوەبەرایەتیی پۆلیسی پارێزگای هەولێر بە ئاڤای گوت:

- ئەو پاسەوانانە لە نێوەڕاستی مانگی 10ی ساڵی ڕابردوو دەستبەكاربوونە و هەموو ڕێوشوێنێكی ئیدارییان بۆ كراوە، بەڵام گرفتەكەیان ئەوەیە تاوەكو ئێستا وەزارەتی دارایی عێراق ڕەزامەندی خەرجكردنی مووچەكەیانی نەداوە.

- بەدڵنیاییەوە ئەو پۆلیسانە هیچ مافێكیان نافەوتێت، چەند مانگ مووچەیان دواكەوتبێت هەموویان بەیەكەوە پێدەدرێت، بەڵام بابەتەكەیان كەوتووەتە ئەستۆی وەزارەتی دارایی عێراق، دارایی هەرێمی كوردستان لە گفتوگۆی بەردەوامدایە لەگەڵ بەغدا بۆ ئەوەی بەزووترین كات مووچەكەیان بۆ دابین بكرێت.