مەسرور بارزانی: یەکێک لە سەروەرییە مەزنەکانی گەلی کوردستان ڕاپەرینە

 

ئاڤا نیوز

34 ساڵ بەسەر  ڕاپەڕینی خەڵکی کوردستان تێپەڕدەبێت، لەو ساڵڕۆژەدا سەرۆکی حکومەتی هەرێمی کوردستان جەخت لە یەکڕیزی و هاوهەڵوێستی لایەنەکان بۆ پاراستنی قەوارە و دامەزراوە شەرعییەکانی هەرێمی کوردستان دەکاتەوە.

وێنە گەورەکە: ڕۆژی 1991-03-05، یەکەم چەخماخەی ڕاپەڕین لە ڕانیە لێدرا و هاووڵاتییان بە پشتیوانیی هێزەکانی پێشمەرگە، دژی زوڵم و ستەمی دەسەڵاتی ڕژێمی بەعس ڕاپەڕین، دواتر ناوچەکانی دیکەی هەرێمی کوردستانی گرتەوە، ڕاپەڕینی ساڵی 1991 بە یەکێک لە ڕووداوە مێژووییەکانی گەلی کورد لە هەر چوار پارچەی کوردستان دادەنرێت.

پەیامی فەرمی: سەرۆکوەزیران مەسرور بارزانی لەو یادەدا پەیامێکی بڵاوکردووەتەوە و دەڵێت:-

٠ یەکێک لە سەروەرییە مەزنەکانی گەلی کوردستان ڕاپەرینە، سەرجەم پێکهاتەکانی گەلەکەمان بەشداریان تێیدا کرد، توانرا هەرێمی کوردستان لە ستەم و داگیرکاری ئازاد بکرێت و لە ئەنجامی هەڵبژاردنێکی ئازاد و دیموکراتییشەوە، پەرلەمان و حکومەتی هەرێمی کوردستان هاتنە ئاراوە.

٠ لە هەموو کاتێک  زیاتر، پێویستیمان بە یەکڕیزی و هاوهەڵوێستیيە لە سەر داکۆکیکردن لە قەوارەی دەستووریی و دامەزراوە یاسایی و شەرعییەکانی هەرێمی کوردستان و ئەو دەسکەوتانەی بە هۆی خەبات و قوربانیدان و گیانفیدایی پێشمەرگە قارەمانەکان و خوێنی گەشی شەهیدە سەربەرزەکانمان بەدەستمان هێناون.