سەرۆك بارزانی: ئەوەی پێمان بكرێ بۆ پڕۆسەی ئاشتی لە توركیا ئەنجامی دەدەین

ئاڤا نیوز

ڕۆژی چوارشەممە 5-2-2025، لە سەلاحەددین سەرۆك مەسعود بارزانی پێشوازی لە ئادریان ئایسڵستێین، كونسوڵی گشتیی هۆڵەندا لە هەولێر كرد و چەند تەوەرێکی پەیوەست بە ناوچەکە تاوتوێ کران.

 

ڕاگەیێنراوی فەرمی: بارەگای بارزانی ڕایگەیاند: لە دیدارەكەدا كونسوڵی گشتیی هۆڵەندا لە هەولێر پێزانینی بۆ ڕۆڵی سەرۆك بارزانی لە مێژووی سیاسیی ناوچەكە و عێراق، دەستەبەركردنی سەقامگیری لە هەرێمی كوردستان هەبوو، وێڕای ئاماژەدان بە پێگە و كاریگەریی هەرێمی كوردستان، ئامادەیی وڵاتەكەی بۆ پەرەپێدانی پەیوەندی لەگەڵ هەرێمی كوردستان لە بوارە جۆراوجۆرەكان بە تایبەتی بواری كشتوكاڵ و گەشتوگوزار و پاراستنی ژینگە ڕاگەیاند.

 

لەلایەکی دیکەوە: لای خۆیەوە سەرۆك بارزانی سوپاسی گەل و حكومەتی هۆڵەندای كرد كە لە ڕۆژانی تەنگانەدا پاڵپشتی گەلی كوردستان بوون، پێزانینی بۆ هێزە سەربازییەكانی هۆڵەندا هەبوو كە لە شەڕی داعش لە چوارچێوەی هاوپەیمانێتیی نێودەوڵەتی یارمەتی هێزی پێشمەرگەی كوردستانیان داوە، جەختیشی لە فراوانكردنی پەیوەندی و دۆستایەتی نێوان گەلی كوردستان و گەلی هۆڵەندا كردەوە.

 

ئەوەی پێویستە بیزانیت: بارودۆخی سیاسیی عێراق و ناوچەكە، گۆڕانكارییەكانی سووریا و هەنگاوەكانی پڕۆسەی ئاشتی لە توركیا تەوەری تری ئەو دیدارە بوون، سەرۆك بارزانی ئەوەی دووپات كردەوە كە ئەوەی پێی بكرێ بۆ یارمەتیدانی پڕۆسەی ئاشتی و چارەسەری لە توركیا ئەنجامی دەدەن.