بە چەکی قورس دەوروبەری بەنداوی تشرین بۆردومان دەکرێت

 

ئاڤا نیوز

گرووپە چەکدارەکانی هاوپەیمانی تورکیا بە چڕی و بە چەکی قورس دەوروبەری بەنداوی تشرین بۆردومان دەکەن.

وێنە گەورەکە: لەگەڵ کەوتنی دەسەڵاتی بەشار ئەسەد لە 8ـی 12ـی ساڵی ڕابردوو، ڕووبەڕووبوونەوە لە نێوان هێزەکانی سووریای دیموکرات 'هەسەدە' و گرووپەکانی نزیک لە تورکیا  لە منبج و بەنداوی تشرین بەردەوامە.

زانیاریی بەدەستهاتوو: بە گوێرەی میدیای نزیک لە هێزەکانی سووریای دیموکرات، کەمێک لەمەوبەر دەوروبەری بەنداوی تشرین لەلایەن گرووپە چەکدارەکانی هاوپەیمانی تورکیا بە چڕی و بە چەکی قورس بۆردومان کرا.

ئەوەی پێویستە بیزانیت: سەرەڕای ناردنی هاووڵاتیان وەک قەڵغانی مرۆیی بۆ پاراستنی بەنداوی تشرین، بەڵام تورکیا و گرووپە چەکدارەکانی نزیک لەو وڵاتە، لە هێرشەکانیان بۆ سەر بەنداوەکە بەردەوامن و بەگوێرەی ئامارەکانی ڕوانگەی سووری بۆ مافەکانی مرۆڤ بەهۆیەوە تائێستا سەدان  کوژراو و بریندار هەن.

لەلایەکی دیکەوە: هەر ئەمڕۆ هێزەکانی سووریای دیموکرات، ناسنامەی چوار لەو چەکدارانەی ئاشکرا کردن، کە لە ڕووبەڕوونەوەی گرووپە چەکدارەکانی نزیک لە تورکیا کوژراون.