لە ئیلامی ڕۆژهەڵاتی کوردستان ئاهەنگی نەورۆز قەدەغە دەكرێت

ئاڤا نیوز

بەرپرسانی پارێزگای ئیلام ڕێگە نادەن ئاهەنگەكانی نەورۆز بەڕێوەبچن و ئەو هاووڵاتیانەش دەستگیر دەكەن كە بانگەوازیان بۆ ئاهەنگێڕان كردووە.

چیرۆكی سەرەكی: وابڕیاربوو ئاهەنگەكانی نەورۆز لە چەند شوێنێكی پارێزگای ئیلام لە ڕۆژهەڵاتی كوردستان بەڕێوەبچێت و چالاكوانانی پارێزگاكەش بانگهێشتی هاووڵاتیانیان دەكرد بەشداریی لە ڕێوڕەسمەكاندا بكەن.

چی ڕوویدا: بەرپرسانی پارێزگای ئیلام کۆبوونەوەیەکی تایبەتیان ئەنجامدا و بڕیاریاندا ڕێگە نەدەن ئاهەنگەکانی نەورۆز بەڕێوەبچن و ڕێکاری یاساییش بەرامبەر ئەو کەسانە بگرنەبەر کەوا بانگەوازیان بۆ ئەو ئاهەنگانە کردووە.

لێدوانی فەرمی: عەبدولوەهاب بەخشندە، داواکاری گشتیی ئیلام، لە کۆبوونەوەی ئەمڕۆی ئەنجوومەنی  فەرمان بە چاکەی ئاماژەی بەوە كردووە، بۆ ڕێوڕەسمی نەورۆز مۆڵەت بە هیچ لایەنێک نادەن و دەبێت ڕێزی مانگی ڕەمەزان بگیرێت و سەرپێچی لە هیچ کەسیش قبوڵ ناکەین.

بەتەنیشت ئەم بابەتەوە: لقی ئیلامی فەرماندەیی سوپای پاسداران

- هۆشداری بە دامودەزگا حکومییەکان داوە کە هیچ یەک لەوان مافی ئەوەیان نییە مۆڵەت بۆ بەڕێوەچوونی ڕێوڕەسمی نەورۆز بدەن.

- لە هەوڵدان ئەو کەسانە دەستگیر بکەن، کە بانگەوازیان بۆ بەڕێوەچوونی ڕێوڕەسمی نەورۆز بڵاوکردووەتەوە و ڕێکاری یاسایی بەرامبەریان دەگرنەبەر.

باكگراوند: ساڵی پار لە زۆر شوێنی پارێزگای ئیلام ڕێوڕەسمی گەورە بۆ نەورۆز بەڕێوەچوون. لە رێوڕەسمێکدا لە ناوچەی کارزان زیاتر لە 60 هەزار کەس بەشدار بوون. هەروەها لە شاری بەدرە، سوپای پاسداران ڕێگەی نەدا ڕێوڕەسمی نەورۆز بەڕێوەبچێت و لە مەڵگشایش بە مەرجی بەشدارینەکردنی خانمان، ڕێگەی دا ڕێوڕەسمی نەورۆز بەڕێوەبچێت.