لە سووریا پێکدادان ڕووی دا و بە دەیان کەس کوژران

ئاڤا نیوز

شەوی ڕابردوو لە شاری لازقییە و جەبلەی سووریا، پێکدادان لە نێوان هێزەکانی ئاسایشی سووریا و پاشماوەکانی ڕژێمی بەشار ئەسەد ڕوویدا و بە دەیان کەس کوژران.

ڕاگەیێنراوی فەرمی: تەلەفزیۆنی فەرمی سووریا ڕایگەیاندووە، پێکدادانەکان لە ناوچەی جەبلە تا بەرەبەیان بەردەوام بوون، کە بەشێکە لە ناوچەی کەنار دەریاکان و زۆرینەی دانیشتوانەکەی لە عەلەوییەکانی نزیکن لە بنەماڵەی بەشار ئەسەدن.

لێدوانی فەرمی: مستەفا کنایفاتی، بەرپرسی بەڕێوەبەرایەتیی ئاسایشی گشتی لازقییە ڕایگەیاند، هێرشەکە پلان بۆ داڕێژراو بووە و چەند گرووپێکی چەکداری سەر بە ڕژێمی ئەسەد هێرشیان کردووەتە سەر سەنگەر و بازگەکانمان لە شاری جەبلە و گوندەکانی.

زانیاریی زیاتر: لە ڕووبەڕووبوونەوەی هێزەکانی ئەحمەد شەرع و عەلەوییەکانی سووریا نزیکەی 85 چەکدار لە هەردوو بەرەکە کوژراون و شەڕ لە حەمس و تەرتوس و لازقییەش تا بەرەبەیان بەردەوام بووە، هاوکات بەهۆی دۆخی سووریا حەشدی شەعبی لە عێراق خراونەتە حاڵەتی ئامادەباشییەوە.

ئەوەی پێویستە بیزانیت: ناوچە کەنار دەریاکانی سووریا یەکێکن لەو ئاڵنگارییانەی ڕووبەڕووی حکومەتی ئەحمەد شەرع بوونەتەوە و حکومەتەکەی کار دەکات بۆ چەسپاندنی دەسەڵاتەکانی لەو ناوچانەی سووریاش کە زۆرێک لە پاشماوەکانی ڕژێمی ئەسەد لەو ناوچانەدا ماون.