مەسرور بارزانی: پابەندین بە زیاتر ڕەخساندنی دەرفەتی یەکسان لەبەردەم ئافرەتان

ئاڤا نیوز

 

سەرۆكوەزیران مەسرور بارزانی، بەبۆنەی ڕۆژی جیهانیی ئافرەتان پەیامێكی پیرۆزبایی بڵاوكردەوە و دەڵێت، پابەندین بە زیاتر ڕەخساندنی دەرفەتی یەکسان لەبەردەم ئافرەتان.

 

وێنە گەورەكە: ئەمڕۆ ڕۆژی جیهانیی ئافرەتانە و لەم ڕۆژەدا لە هەرێمی كوردستان وێڕای بڵاوكردنەوەی پەیامی پیرۆزبایی لەلایەن سەركردە و بەرپرسانی باڵاوە،چالاكیی جۆراوجۆر بەڕێوەدەچێت.

 

بڵاوكراوەی فەرمی: سەرۆكوەزیران مەسرور بارزانی ڕایگەیاند:

 

- بە بۆنەی هەشتی مارس، ڕۆژی جیهانیی ئافرەتان، پیرۆزبایی لە سەرجەم ئافرەتانی کوردستان و جیهان دەکەم، ڕێز و پێزانینی زۆرمان بۆ خەبات و تێکۆشان و ڕۆڵی دیاری ئافرەتانی کوردستان لە مێژووی گەلی کوردستاندا هەیە کە هەمیشە نموونەی نیشتمانپەروەری و ئازایەتیی و گیانفیدایی و قوربانیدان بوون.

 

- جێی خۆشحاڵییە ئەمڕۆ ئافرەتان لە هەرێمی کوردستان، ڕۆڵێکی بەرچاو و کارایان لە دامەزراوەکانی هەرێمی کوردستاندا هەیە و پابەندیشین بە زیاتر ڕەخساندنی دەرفەتی یەکسان لە بەردەم ئافرەتانی کوردستان و بەرزکردنەوەی ڕێژە و ئاستی بەشداریان لە بوارە جۆراوجۆرەکانی بەڕێوەبردن ، هەروەها ڕووبەڕووبوونەوەی هەموو جۆرە توندوتیژی و جیاکارییەک لە دژی ئافرەتان.

 

- هەشتی مارس پیرۆز بێت و هیوای پێشکەوتنی زیاتر بۆ ئافرەتانی کوردستان دەخوازم.

 

باکگراوند: لە ساڵی 1975ـەوە نەتەوە یەکگرتووەکان ئەم ڕۆژەی وەک ڕۆژی جیهانی ئافرەتان دیاریکردووە، بەڵام لە ساڵی 1977 نەتەوە یەکگرتووەکان داوای لە وڵاتانی ئەندام کرد، ڕۆژی 8ـی مارس وەک ڕۆژی پشوو بۆ ئافرەتان بناسێنن، لەو کاتەوە ساڵانە بۆنەی جیاواز بۆ ئەو ڕۆژە ڕێک دەخرێت.