لە گوندێکی گەرمیان 30 سەر مەڕی هاووڵاتییەک دەدزرێت

ئاڤا نیوز

 

شەوی ڕابردوو لە گوندی ئاوباری بناری خۆشک لە گەرمیان 30 سەر مەڕی ھاوڵاتییەک دەدزرێت و ئێستا بکەرانی دزییەکە نەدۆزراونەتەوە.

 

چیرۆکی سەرەکی: شەوی ڕابردوو لە دوای کاتژمێر دووی شەو، خاوەنی مەڕ و ماڵاتێک لە گوندی ئاوباری خوشک لە سنووری گەرمیان مەڕەکانی لە گوندەکە بەجێدەهێلێت و دەچیتە ماڵەوە لە سەنتەر قەزای دەربەندیخان بۆ ئەوەی پارشێو بکات، لەو کاتە مەڕەکانی لێدزراوە.

 

لێدوانی فەرمی: سەڵاح حاجی فەتاح، خاوەنی مەڕوماڵاتەکە بە ئاڤا میدیای ڕاگەیاند، کاتێک مەڕەکانم بەجێهێشت و چوومە ماڵەوە مەڕەکانم ژمارەیان 61 سەر مەڕ بوون، چونکە هەر ئەوەندەم هەبوون، بەڵام کە گەڕامەوە بینیم 30 سەر لە ئاژەڵەکانم نەماون و دزراون، ئێستا تەنیا 31 مەڕم ماوە.

زانیاریی زیاتر: وەک خۆی دەڵێت، سەلاح حاجی سکاڵای تۆمار کردووە بەڵام گومانی لە ھیچ کەسێک نییە، کە ئەو کارەی کردبێت، چونکە هیچ کێشەیەکی لەگەڵ کەس نەبووە و نییە.

زانیاریی بەدەستهاتوو: بەپێی زانیارییەکانی ئاڤا، تا ئێستا هیچ کەسێک لەسەر ئەم بابەتە دەستگیر نەکراوە بەڵام هێزە ئەمنیەکان خەرێکی بەدواداچونن و لە ڕێگەی کامێرای چاودێرییەوە بەدوای تۆمەتبارەکان دەگەڕێن.