‎ئەنەکەسە لەبارەی گرژییەکانی سووریا: ئەم دۆخە پشێویی و دابەش بوون زیاتر دەکات

ئاڤا نیوز

 

ئەنجوومەنی نیشتیمانی کورد لە سووریا (ئەنەکەسە) دەڵێت، بە نیگەرانییەکی زۆرەوە چاودێریی پێشهاتەکانی  پارێزگا کەناراوەکانی سووریا دەکات کە بەهۆیەوە سەدان کەس کوژراون، جەختیش دەکاتەوە کە ئەو پێشهاتانە نەهامەتییەکانی گەلی سووریا و حاڵەتی پشێویی و دابەش بوون زیاتر دەکات.

 

چیرۆکی سەرەکی: لە شەوی 6ی ئەم مانگەوە شەڕ و پێکدادان لە نێوان پاشماوەکانی دەسەڵاتی پێشووی سووریا و هێزەکانی ئیدارەی نوێی ئەو وڵاتە لە پارێزگا کەناراوەکان دروستبووە و بەگوێرەی ڕوانگەی سووریی تا ئەمڕۆ نزیکەی 400 کەس کوژراون.

 

ڕاگەیێنراوی فەرمی: ئەنجوومەنی نیشتیمانی کورد لە سووریا (ئەنەکەسە) لە ڕاگەیێنراوێکدا ئاماژەی بەوەشکرد: ئەو پێشهاتە هاوکاتە لەگەڵ زیادبوونی ناڕەزاییەکان لە چەند ناوچەیەکی سووریا کە تیایدا داوای بەشداری هەمووان دەکرێت لە نووسینەوەی دەستوور و داهاتووی وڵات.

 

- ئێمە ئیدانەی ئەو هێرشە چەکدارییانە دەکەین کە ئارامیی و هێزەکانی ئاسایشی ناوخۆ بە ئامانج دەگرن.

- وای دەبینین ڕژێمی دیکتاتۆریی کە وڵاتی وێران کرد و ملیۆنان کەسی ئاوارە کرد، تائێستاش هەوڵی قۆستنەوەی دۆخەکە دەدات بۆ نانەوەی پێشوویی.

- هۆشداریی دەدەین لە سیاسەتی پەراوێزخستن کە حکومەتی کاتی سووریا کاری لەسەر دەکات و ئەوەش کاریگەری مەترسیداری لەسەر وڵات دەبێت.

- لێکۆڵینەوە لە هەموو پێشێلکارییەکان بکرێت و حکومەتی کاتی پێکبهێنرێت کە ڕەنگدانەوەی خواستی هەموو سوورییەکان بێت.