نزیکەی 400 مۆلیدەی ئەهلی لە گەڕەکەکانی هەولێر لابران

ئاڤا نیوز

لە چوارچێوەی جێبەجێکردنی پرۆژەی ڕووناکی بۆ کارەبای 24 کاتژمێری، نزیکەی 400 مۆلیدەی ئەهلی لە گەڕەکەکانی هەولێر لابران.

وێنە گەورەکە: پرۆژەی ڕووناکی کە مانگی 10ی ساڵی ڕابردوو لە لایەن مەسرور بارزانی، سەرۆکوەزیرانی هەرێمی کوردستانەوە ڕاگەیێنرا، بە پێی پلانەکە دابینکردنی کارەبای 24 کاتژمێری تاوەکو کۆتایی ساڵی 2026 لە تەواوی هەرێمی کوردستان دەچێتە بواری جێبەجێکردنەوە.

ڕاگەیێنراوی فەرمی: وەزارەتی کارەبای حکومەتی هەرێمی کوردستان ڕایگەیاند،

- ئێستا 90 هەزار ماڵ و شوێنکار و پڕۆژەی تایبەت سود لە کارەبای 24 کاتژمێریی وەردەگرن، هەر لەو چوارچێوەیەدا هەفتەی ڕابردوو لە سلێمانی یەکەم گەڕەک لە شارەکە پڕۆژەی ڕووناکی تێدا چالاک کرا.

- لە چوارچێوەی جێبەجێکردنی پلانی کارەبای 24 کاتژمێری کە سودێکی زۆری ژینگەیی هەیە و یەکسانە بە کەمکردنەوەی 60 هەزار ئۆتۆمبێل لە شەقامەکان، 400 مۆلیدەی تایبەت لە گەڕەکەکانی شاری هەولێر لابران.

ئەوەی پێویستە بیزانیت: نزیکەی  5 هەزار مۆلیدەی کەرتی تایبەت لە سەرانسەری کوردستان کار دەکەن و خزمەت بە ماڵ و شوێنە بازرگانییەکان و حکومەت دەکەن، بۆ ماوەی چەندین ساڵە ئەو بۆشاییە پڕ دەکەنەوە کە حکومەتی هەرێمی کوردستان هەوڵ بۆ پڕکردنەوە و چارەسەرکردنی دەدات.