127 گەڕەك و ناحیە و كۆمەڵگە لە پڕۆژەی فریاگوزاریی ئاوی هەولێر سوودمەند دەبن

ئاڤا نیوز

مانگی حەوتی ئەمساڵ پڕۆژەی فریاگوزاریی خێرای ئاوی هەولێر دەگاتە 127 گەڕەك و ناحیە و كۆمەڵگەی پارێزگای هەولێر كە بەهۆیەوە دوو ملیۆن هاووڵاتیی هەولێر لێی سوودمەند دەبن. بەڕێوەبەری گشتیی ئاوی هەرێمی كوردستانیش دەڵێت 65%ـی پڕۆژەكە تەواو بووە.

وێنە گەورەكە: پرۆژەی فریاگوزاریی ئاوی هەولێر بە یەكێك لە پڕۆژە گرنگ و ستراتیژییەكانی كابینەی نۆیەمی حكومەتی هەرێمی كوردستان دادەنرێت و ئێستا بەشێوەی 24 كاتژمێری كاری تێدا دەكرێت، بەگوژمەی 480 ملیۆن دۆلار جێبەجێ دەكرێت و لەكاتژمێرێكدا 20 هەزار مەتر سێجا ئاو دابین دەكات، بە تەواوبوونی گرفتی كەمی ئاوی خواردنەوە لە هەولێر بۆ 30 ساڵی ئایندە، چارەسەر دەكات.

زانیاریی بەدەستهاتوو: ئێستا لەسەرجەم ئەو گەڕەك و شوێن و كۆمەڵگانەى كه كەوتوونەتە سنووری شارەوانییەكانی؛ دوو، سێ، چوار، پێنج و شەش، دەستكراوە بە دانانی بۆڕی بە تیرەی جیاواز بەدرێژایی 450 كیلۆمەتر بەمەبەستی بەستنەوەی بە تۆڕی سەرەكی پڕۆژەكە، بە تەواوبوونیشی هەزار بیری ئاو دادەخرێن.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی كوردستان تایبەت بە ئاڤا ڕایگەیاند، 65%ـی پڕۆژەكە تەواوبووە و بەپێی پلانی داڕێژراو پڕۆژەكە لە كاتی دیاریكراوی خۆیدا واتە لەمانگی تەمموزی ئەمساڵ تەواو دەبێت و تا كۆتایی ئەمساڵیش تەواوی ئەو شوێنانە لێی سوودمەند دەبن كە لیستەكەدا هاتوون.

باكگراوند: لە ئەیلولی ساڵی ڕابردوو، سەرۆكوەزیران مەسرور بارزانی، بەردی بناغەی پڕۆژەی فریاگوزاریی خێرای ئاوی هەولێری دانا، هەر ئەوكات فەرمانی كرد، لەگەڵ گەیشتنی ئاو بە سەنتەری شاری هەولێر، پێویستە تۆڕە ناوخۆییەكانی نێو گەڕەك و ناحیە و قەزاكانیش ئامادە بێت.