فایلی خەڵک؛ ناحیەی خورماڵ بەدەست کەمی خزمەتگوزارییەوە دەناڵێنێت

ئاڤا نیوز

بەهۆی قیرتاو نەکردنی بەشێکی کۆڵانەکانی، دانیشتوانی ناحیەی خورماڵ ناڕەزایەتی دەردەبڕن و دەڵێن هاوینان تەپوتۆز و زستانان قوڕ و چڵپاو هەراسانی کردووین.

چیرۆکی سەرەکی: دانیشتوانی ناحیەی خورماڵ بەهۆی ئەوەی بەشێکی کۆڵانەکانیان تا ئێستا قیرتاو نەکراوە ناڕازین و لە ڕێگەی ئاڤاوە داوا دەکەن دوای چەندین ساڵ دەستی خزمەتگوزارییان پێ بگات و شەقام و کۆڵانەکانیان بۆ قیرتاو بکەن.

لێدوانی فەرمی: جەزا تەحسین، یەکێک لە دانیشتوانی گەڕەکی قەڵا، بە ئاڤا میدیای ڕاگەیاند: "ئێمە نزیکەی سەد ماڵین لەم گەڕەکە کە کۆنترین گەڕەکی خورماڵە و لەسەر قەڵای گەڕاو هەڵکەوتووە." ئەم گەڕەکە ماڵی چەندین کەسایەتی دیاری تێدا بووە ، بەڵام تاکە گەڕەکین قیرتاومان بۆ نەکراوە، قوڕ و چڵپاوی زستان و تەپوتۆزی هاوین بێزاری کردووین، بۆیە داواکارین گەڕەکەکەی ئێمەش قیرتاو بکرێت."

نیگەرانیشی دەربڕی لەوەی کە پڕۆژەی ئاوی خورماڵ نزیکە لێیانەوە و هەندێک جار قوڕاوی کۆڵانەکان تێکەڵ بە ئاوی پڕۆژەکە دەبێت. هەروەها ئاوی گەڕاو و ئاوی گەنجان، کە هەردووکیان ناوچەی گەشتیارین، لەناو گەڕەکەکەیاندان و ڕۆژانە گەشتیار ڕوو لە گەڕەکەکەیان دەکات، بۆیە پێویستە خزمەتگوزارییەکانی بۆ تەواو بکرێت.

بۆچوونی لایەنی بەرامبەر: ئوسامە سەبری، سەرۆکی شارەوانی خورماڵ، بە ئاراس ڕەفیق پەیامنێری ئاڤای وتووە،  قیرتاوکردنی ئەو گەڕەکە و چەند پڕۆژەیەکی تری خورماڵ لە کاتی سەردانی دووەمجاری سەرۆک وەزیران مەسرور بارزانی بۆ پارێزگای هەڵەبجە لە 30ـی حوزەیرانی 2024 ڕەزامەندی لەسەر دراوە. هەندێک ڕۆتیناتی کارگێڕی ماوە لە وەزارەتەکاندا، ئەویش تەواو ببێت ئێمە ئامادەین قیڕتاوی بکەین، مافی ڕەوای خۆیانە کاریان بۆ بکرێت.

ئەوەی پێویستە بیزانیت: خورماڵ چەندین شوێنی گەشتیاری جوانی تێدایە وەک مزگەوتی گەورە، قەڵای خورماڵ، گەنجان، گەڕاوەکە، زەڵم، ئەحمەد ئاوا، بەڵام بەداخەوە وەکو پێویست خزمەت ناکرێت.