دوو حیزبی نوێ بێ بەستنی کۆنگرە بەشداری هەڵبژاردن دەکەن

ئاڤا نیوز

بەگوێرەی ڕێنمایی کۆمیسیۆن، حیزبە نوێیەکانی کوردستان دەتوانن بەبێ کۆنگرە بەشداری هەڵبژاردن بکەن، بۆ هەڵبژاردنی ئەمجارەش تەنیا دوو حیزبی نوێ مۆڵەتیان وەرگرتووە.

وێنە گەورەکە: دوو حیزبی نوێ لە هەرێمی کوردستان دامەزراون، لاهور شێخ جەنگی مۆڵەتی حیزبەکەی بە ناوی (بەرەی گەل) و کامیلی حاجی عەلی مۆڵەتی حیزبەکەی بە ناوی بزووتنەوەی پەیوەندیی ئیسلامی وەرگرتووە, بەگوێرەی ڕێنمایی کۆمیسیۆن دەتوانن بەشداری هەڵبژاردنی پەرلەمانی کوردستان بکەن.

لێدوانی فەرمی: فەرهاد ئەسعەد شێتنە، بەرپرسی کاروباری پارتەکان لە لقی هەولێری کۆمیسیۆن بە ئاڤا نیوزی گوت، "39 حیزب لە وەزارەتی ناوخۆی هەرێمی کوردستان مۆڵەتیان هەیە، دوو لەوان نوێن و دەتوانن بەشداری لە هەڵبژاردن بکەن، کۆنگرە نابێتە مەرج بۆ بەشداریکردنیان."

ئەوەی پێویستە بیزانیت: بەپێی یاسای ژمارە 9ی ساڵی 2020ی هەڵبژاردنی ئەنجوومەنی نوێنەرانی عێراق، پێویستە ئەو حیزبە سیاسییانەی بەشداری هەڵبژاردن دەکەن، لە ماوەی 10 ساڵی ڕابردوودا کۆنگرەیان کردبێت.

هۆکارە زانراوەکان: یاساکەی کۆمیسیۆن پشت بە پەیڕەوی حیزبەکان دەبەستێت بۆ بەستنی کۆنگرە، بەڵام بەهۆی ئەوەی حیزبە نوێیەکان پەیڕەویان نییە، جاری یەکەم ڕێگەیان پێدەدرێت بەشداری هەڵبژاردن بکەن.

لەلایەکی دیکەوە: هەرێم شێرە، کەسی نزیک لە لاهور شێخ جەنگی بە ئاڤا نیوز گوت"سەرجەم ڕێکارە یاسایی و تەکنیکییەکان تەواوکراون، پرۆسەی دیاریکردنی کاندیدەکان دەستیپێکردووە".

هاوکات محەممەد بازیانی، گوتەبێژی بزووتنەوەی پەیوەندیی ئیسلامی بە ئاڤا نیوزی گوت: کۆمسیۆن بە نووسراو ئاگاداری کردووینەتەوە، کە دەتوانین بە کۆنگرە لە پرۆسەی هەڵبژاردن لیستمان هەبێت.

ئەمەش بزانە: لە 5ی ئەم مانگەوە دەرگای تۆمارکردن بۆ حیزب، هاوپەیمانی و بەربژێرانی سەربەخۆ، بۆ هەڵبژاردنی خولی شەشەمی پەرلەمانی کوردستان کراوەتەوە و  تاوەکو 14ی مانگ بەردەوام دەبێت، جگە لەم دوو حیزبە نوێیە بڕیارە چەندین کاندیدی سەربەخۆش بەشداریی بکەن.