مایكرۆسۆفت گەورەترین دۆزینەوەی سەدە ڕادەگەیێنێت

ئاڤا نیوز

كۆمپانیای مایكرۆسۆفت جۆرە ماددەیەك دەدۆزێتەوە كە نە شلە، نە ڕەقە و نە گازی، دەگوترێت؛ چیپەكەی بۆ چارەسەری كێشە پیشەسازییەكان بەكاردەهێنرێت و توانای خۆچاككردنەوەی هەیە.


چیرۆكی سەرەكی: لەسەرەتای ئەم مانگەدا مایکرۆسۆفت پەردەی لەسەر چیپی کوانتەمی Majorana 1 لادا، کە مایکرۆپڕۆسێسەرێکە و تایبەتمەندییەکانی ماددەیەکی سەرسوڕهێنەر بەکاردەهێنێت کە پێی دەوترێت سوپەرکۆندێکتەری تۆپۆلۆژی. تەنۆلکە گەلێك بەرهەمدێنێت کە نە شلەن و نە ڕەقن، نە گازیشن، زاناکانیش ئەمە بە گەورەترین دۆزینەوەی سەدەی 21 دادەنێن.


بڵاوكراوەی فەرمی: ئەم کارە 17 ساڵ لەمەوبەر دەستی پێکردووە، مایکرۆسۆفت ئەم دۆخە نوێیەی ماددەی لە توێژینەوەیەکی ناوازەدا خستەڕوو کە لە گۆڤاری Nature بڵاوکراوەتەوە.

لێدوانی فەرمی: پڕۆفیسۆر عەزیز بەرزنجی، مامۆستای زانکۆی سۆران و پسپۆڕی فیزیای كوانتەم لەمبارەیەوە ڕایگەیاند، "بۆچوونم وایە؛ ئەوە تەنها دەستکەوتێکی زانستی نیە بەڵکو شۆڕشێکە لە بواری 'کوبیتە تۆپۆلۆژییەکان' كە چەمکێکی تەواو نوێیە لە کۆمپیوتەری کوانتەمدا ، گەرەنتیی سەقامگیریی زیاتر و هەڵەی کەمتر دەدات بە بەراورد بە کوبیتە تەقلیدییەکان."

زانیاریی زیاتر: ئەو پرۆفیسۆرە بۆچوونی وایە؛ زانیاری لە کوبیتە تۆپۆلۆژییەکان دەچێتە ئاستی وردی ئەتۆم یان تەنۆلکەکان، سەرەڕای کۆدکردنی 'تۆپۆلۆژی'ی ماددەکان. مەبەستیش لە تۆپۆلۆژی ڕێکخستنی پەیوەندی ماددەیە لە ئاستێکی زۆر ووردا، بە جۆرێك ئاستی گەرد و گەردیلەکانیش تێدەپەڕێنێت. ئەم ڕێبازە پشت بە ‘گەردیلەکانی ماجۆرانا’ دەبەستێت، کە وەك تەنۆلکەی ژێر ئەتۆمیی ناسراوە و کلیلی ئەم فۆرمە ناوازەیە و توانایەکی ڕادەبەدەری هەڵگرتنی زانیاری کوانتەمیان هەیە.

بۆچی گرنگە: مایکرۆسۆفت دەڵێت دەتوانرێت چیپەکەی بۆ چارەسەرکردنی کێشە پیشەسازییەکان بەکاربهێنرێت، وەک دیزاینکردنی کەرەستەی بیناسازی خۆچاککەرەوە و خێراکردنی پڕۆسەی دۆزینەوەی دەرمان و چەندین بواری پێشکەوتووی دیکە.