گۆڤارێکی ئەمریکی: دوای سووریا ڕەنگە عێراقیش بکەوێت

ئاڤا نیوز

گۆڤاری فۆرێین ئەفێرزی ئەمریکی پێشبینی دەکات گورزی گەورەتر بەر ئێران و بەرەی مقاوەمە بکەوێت و ئەوەی بە سەر سووریادا هات بە سەر عێراقیشدا بێت.

 

ئەوەی پێویستە بیزانیت: گۆڤارەکە، کە بایەخ بە پەیوەندییە نێودەوڵەتییەکان و سیاسەتی دەرەوەی ئەمریکا دەدات، دەنووسێت، دوای کەوتنی سووریا، ئەگەری هەیە عێراقیش بکەوێت و ئەمەش دەبێتە زیانێکی گەورە بۆ کۆماری ئیسلامیی ئێران کە لە ساڵی 1979ـەوە هەوڵی درووستکردنی بەرەیەکی فراوان لە پڕۆکسی و هاوڕێ و هاوپەیمانان لە ڕۆژهەڵاتی ناوەڕاست دەدات.

 

زانیاریی زیاتر: بەگوێرەی شیکاری گۆڤارەکە، بۆ چەندین ساڵ ئێران توانی بووی کاریگەریی زۆری لە عێراق و لوبنان و سووریا و یەمەن هەبێت و لە دژی ئیسرائیل و ئەمریکا بەکاریان بهێنێت. بەڵام ڕووداوەکانی ساڵی ڕابروو بوونە هۆی ئەوەی ئێران ئەو دەستڕۆیشتووییەی نەمێنێت و هەر یەکە لە سووریا و لوبنان لەدەست بدات. ئیستاش ئەگەری ئەوە هەیە کە ئەوەی لە سووریا و لوبنان ڕوویاندا لە عێراقیش ڕوو بدات و دەستەڵاتی عێراق بکەوێتە دەست کەسانێک کە لایەنگری ئێران نەبن.

 

لەلایەکی دیکە: بەگوێرەی فۆرێین ئەفێرز، ئێستا بەرپرسانی عێراقی و لە سەرووشیانەوە محەممەد شیاع سوودانی، سەرۆکوەزیرانی عێراق، زیاتر هەوڵی ڕازیکردنی ئەمریکا دەدەن. لەگەڵ ئەوەشدا حکومەتەکەی سوودانی سێ سازشی بەرامبەر بە ئەمریکا کردووە، لەوانە: هەڵوەشاندنەوەی فەرمانی دەستگیرکردنی دۆناڵد ترەمپ؛ ڕازیبوون بە ئازادکردنی ئێلیزابێت تسورکۆڤ، توێژەری ئەمریکی-ئیسرائیلی کە لەلایەن کەتائیبی حیزبوڵاوە ڕفێنراوە؛ هەروەها تێپەڕاندنی هەمواری یاسای بودجە کە کورد لە عێراق زۆر دەمێک بوو چاوەڕێی دەکرد. هەموو ئەمانە نیشانەی ئەوەن کە عێراقی هاوپەیمانی ئێران خۆی لە دۆخێکی لاواز دەبینێتەوە.