ئەمریکا شاندێکی دانووستانکار بۆ ڕووسیا دەنێرێت

ئاڤا نیوز

سەرۆکی ئەمریکا بڕیاریدا شاندێکی دانووستانکاری ئەمریکی بۆ ڕووسیا بنێرێت ئەمەش وەک هەنگاوێک بۆ ڕازی بوونی ڕووسیا بە ئاگربەستی ئۆکراینا.

وێنە گەورەکە: لە چوارچێوەی هەوڵەکان بۆ ڕاگرتنی شەڕی ئۆکراینا و ڕووسیا، ئاگربەستێکی 30 ڕۆژە بە نێوەندگیری ئەمریکا لەلایەن ئۆکرایناوە پەسەند کرا، دۆناڵد ترەمپ، سەرۆکی ئەمریکا بڕیاری دا شاندێکی باڵای ئەمریکا بۆ ڕووسیا بنێرێت بۆ تاوتوێ کردنی ڕێککەوتنی ئاگربەستەکە کە دوێنێ لە سعودییە واژۆ کرا.

لێدوانی فەرمی: دیمیتری پیسکۆڤ، وتەبێژی سەرۆکایەتیی ڕووسیا ڕایگەیاند: ڕووسیا و ئەمریکا پلانیان هەیە لە ماوەی چەند ڕۆژی داهاتوودا دانووستانی  دوو قۆڵی ئەنجام بدەن، بۆ تاوتوێ کردنی دەرەنجام و وردەکاری ئەو ئاگربەستەی کە ئۆکراینا و ئەمریکا  لە سعودییە لەسەری ڕێککەوتن''.

زانیاری زیاتر: بە گوێرەی زانیارییەکانی پیسکۆڤ، هەریەکە لە مارکۆ ڕوبیو وەزیری دەرەوەی ئەمریکا و مایک والتز، ڕاوێژکاری ئاسایشی نیشتمانی ئەمریکا، مۆسکۆ لە وردەکارییەکانی دانووستانەکانی سعودییە ئاگادار دەکەنەوە".

ئەمەش بزانە: دوێنێ لە سەروبەندی ئاگربەستەکەی ئۆکراینا، ڤلادیمێر پوتن، سەرۆککۆماری ڕووسیا، بە جلوبەرگی سەربازییەوە، لە کورسک سەربازەکانی بەسەرکردەوە.