دەم پارتی داوای چاوپێکەوتن لە ئەردۆغان دەکات

 

ئاڤا نیوز

دوای ئەوەی ڕەجەب تەیب ئەردۆغان، سەرۆککۆماری تورکیا ڕایگەیاند، ئەگەر دەم پارتی داوای چاوپێکەوتنم لێ بکات، قبووڵی دەکەم. ماوەیەکی کورت دوای لێدوانەکە شاندی دەم پارتی داوای چاوپێکەوتنیان لە ئەردۆغان کرد.

بۆچی گرنگە: ئەمە دەبێتە یەکەم کۆبوونەوەی شاندی دەم پارتی لەگەڵ سەرۆککۆماری تورکیا لەو کاتەوەی ماوەی چارەسەری پرۆسەی ئاشتی دەستیپێکردووە.

لێدوانی تایبەت: محەمەد کەماچ، پەرلەمانتاری دەم پارتی بە ئاڤا میدیای ڕاگەیاند، ئەردۆغان لە دوای واژۆکردنی ڕێککەوتنی نێوان هەسەدە و حکومەتی نوێی سووریا ڕوونتر لەسەر پرۆسەکە قسەدەکات، بە ئەگەرێکی زۆرەوە سبەی شاندی دەم پارتی سەردانی کۆشکی کۆماری دەکەن بۆ وەرگرتنی کاتێک بۆ کۆبوونەوەکە.

زانیاریی زیاتر: ئەردۆغان، دوێنی لە دوای دەرچوونی لە کۆبوونەوەی فراکسیۆنی ئاکپارتی لە پەرلەمان تووشی پرسیاری ڕۆژنامەنووسان بوو، یەکێک لە ڕۆژنامەنووسەکان پرسی:

 "جاری پێشوو چاپێکەوتنت لەگەڵ شاندی ئیمرالی ڕەتکردەوە، ئەمجارە لەگەڵ شاندەکە کۆدەبیتەوە؟، ئەردۆغان گوتی: برادەرانی فراکسیۆن لەگەڵیان کۆدەبنەوە، ئەگەر داوای چاوپێکەوتن لە من بکەن، بە ڕێزەوە قبووڵی دەکەم". ڕاستەوخۆ دوای بڵاوبوونەوەی ئەو لێدوانە، تونجەر بەکرهان، سەرۆکی دەم پارتی گوتی: شاندەکەمان لەگەڵ سەرۆککۆمار کۆدەبێتەوە، بۆچی کۆنەبینەوە؟ "هەر لەسەرەتاوە ئەو گرنگترین لایەنی چارەسەری ئەم پرۆسەیە بووە". شاندەکە لەم دوو ڕۆژە سەردانی کۆشکی کۆماری بکەن، بۆ ئەوەی کاتێک بۆ چاوپێکەوتن لەگەڵ ئەردۆغان وەربگرن.

ئەوەی پێویستە بیزانیت: دوای بانگەوازەکەی عەبدوڵڵا ئۆجەلان، ڕێبەری زیندانیکراوی پەکەکە، شاندی دەم پارتی کە لە هەردوو هاوسەرۆکانی دەم پارتی، تونجەر بەکرهان و تولای هاتیمئۆغلولەری پێک هاتوون، گەڕی دووەمی سەردانەکانیان دەستپێکرد.

لە 10-3 سەردانی پارتی کرێکارانی تورکیا، پارتی جەهەپە و پارتی دێڤایان کرد.

لە 12-3 سەردانی پارتی تیپ، پارتی سەعادەت و پارتی ئایندەیان کرد.

هەنگاوی داهاتوو: بریاروایە شاندەکە لە 17-3 لەگەڵ مەهەپە و ئاکپارتی لە پەرلەمانی تورکیا کۆببێتەوە.